KUCHING: Jalai Besai Pan Borneo (LPB) Sarawak deka dipejalaika sebuah serikat ti dikemendar Opis Menteri Pekara Wang pengelama tiga taun berengkah ari pengawa nyerahka pakej ti udah tembu berenggat.
Menteri Kereja Raya, Datuk Seri Alexander Nanta Linggi madah, pengawa nyiri serikat nya bepelasar sekeda atur ti udah ditetap Opis Menteri Pekara Wang.
Opis menteri benung bejalaika aum dikena nentu skop enggau ungkus projek ti dipelaba tembu ba taun tu.
“Dikena nerus pengawa nyendia servis perintah, pakej ti udah tembu tu deka diteju ba baruh pengawa nyeleti jalai Perintah Besai ti endang udah bisi.
“Pekara tu dikena nyaga pengelikun enggau pengelantang penguna jalai alun nyentuk kunterik baru mujur disain,” ku iya.
Nanta mansutka jaku nya rambau nyaut tanya Kaban Parlimen Tanjong Manis, Yusof Abdul Wahab bekaul pengawa nyeleti LPB Sarawak pengudah tembu.
Ari sukut pemansang, Nanta madah, Renggat Keterubah Projek LPB Sarawak manggai 94 peratus tembu naka bulan April tu.
Iya madah, tebal agi sekeda jalai besai nya disadang tembu ba bulan November tu kelimpah sekeda endur ba Miri ti patut digaga baru lalu disadang tembu ba taun 2025.
