SIBU: Woksyop Ngerembaika Pantun Iban 2025 diatur ba Rumah Rantai Ugak, Luyang Baru, Skim Sekuau chukup richah enggau program randau sereta main asal.
Woksyop main asal keterubah baka nya diatur Gerempung Bakat Dayak Sarikei enggau sukung ari Kaunsil Seni Sarawak (MSS).
Tun Jugah Foundation betuai ke Datuk Patinggi Tan Sri Leonard Linggi anak Tun Jugah mega sama meri sukung ngemujurka woksyop nya.
Lalu temuai dipebasa dikangau bejadi pengawa Kaban Kunsil Nengeri (ADUN) Tamin, Ir. Christopher Gira Sambang disempulang penatai bala pemesai enggau pemelanja program bukai.
Bala penyereta ti datai ari mayuh menua nyengkaum bala pengelicha ari palan pelajar tinggi, pengajar sekula, bala pelajar, sereta bala ti rindu ke pengawa bekaul enggau Leka Main enggau Pantun Iban.
Komiti Pengatur madah, entara batang randau dibai baka Oral History, Leka enggau Sada Pantun, Leman Budaya Iban, Leka Pantun tauka leka main dalam litericha Iban ti dikenatai bala panel ti udah dikangau bekunsi penemu ba woksyop nya.
Ku raban nya, licha pasal Oral History udah dikenatai Direktor Sejarah Lisan ari Yayasan Tun Jugah, Dr. Robert Menua Saleh.
Seraya kenang senentang Leka enggau Sada dipejurai bala pemantun ti anda ari menua Kapit iya nya Helen Manjan, Bintang Unyat, Thedostan Inting, Ali Jambun enggau Wilson Indin.
Nambah ke nya, penemu senentang Leman Budaya Iban udah dipedua Pengajar Jimbun Tawai lalu Leka Pantun tauka Leka Main dalam Litericha Iban dibantaika Ngabong Katoi.
Ba wokshop nya mega, bala penyereta diajar bala panel senentang chara nyada, chara ngarang, chara ngerinika leka pantun.
Pengawa dua hari berungu nya ukai semina mantaika Pantun Iban aja, ke alai malam nya mega mantaika Gendang Pampat, Muka Kuta, Beramban, Mantaika bengkah Tabuh Iban, Bengkah Ajat enggau Kuntau, bengkah Leka Main Asal enggau Bengkah Pantun.
Sama datai, pegawai ari MSS, Celestine Guang, Chairmain Gerempung Bakat Dayak Sarikei, Pemungkal M.O Sarawak, Asat Nawin, Agustine Das Basih, William Rambung enggau bala tuai raban bansa enggau tuai komuniti (KMKK) ngelingi nya.
