SELANGAU: Apai indai ditu diperansang nyukung sereta nganjung anak sida belajar ba sekula bansa China.
Kaban Kunsil Nengeri (Adun) Tamin, Christopher Gira Sambang madah, iya meransang apai indai ari raban bansa Iban ba sitak nya nganjung anak sida besekula ba sekula China.
Kebuah pia ku iya ngambi anak sida landik nguasa jaku Mandarin ti ulih meri pengelebih ngagai sida.
Gira mansutka jaku nya ba Program Ngintu Taun Baru China 2023 ti diatur Gerempung Komuniti China Selangau ba Balai SJK (C) Tong Ah kemari.
“Bisi 180 nembiak besekula ba sekula tu lalu 140 iku ari penyampau tu endang nembiak bansa Iban.
“Sekula tu nyadi sebengkah alternatif ngagai nembiak ditu belajarka silibus jaku Mandarin,” ku iya.
Ba program nya, Gira diberi basa bejadika panggau baru SJK Tong Ah ti beungkus RM150,000 ngena agih belanja Program Transformasyen Menua Pesisir (RTP) 2021 DUN Tamin.
Sama datai Kaban Parlimen Selangau, Edwin Banta, Senator Rita Insol, Kapitan Ting Hua Chuan, Pegawai Pelilih Selangau, Inting Nyami, Tuai Pelajar Pelilih Selangau, Gawan, bala tuai raban bansa enggau tuai komuniti China Selangau.
