KUCHING: Miri Country Music Festival (MCMF) 2023 deka diatur pechuma ungkup taun tu dikena masa sukung penuh bala peminat ti udah ngerichahka pengerami nya.
Menteri Dagang Temuai, Industri Kreatif enggau Seni Pemerindang (MTCP), Datuk Seri Abdul Karim Rahman Hamzah madah, nya mega serimbai pengawa ngintu genap taun MCMF ke-10 ti deka diatur kena 1 nyentuk 2 Disember ba Coco Cabana, Miri.
“Pengerami taun tu mai reti ti besai dikena ngintu jeman sepuluh taun MCMF ti mandangka penyelai muzik menua pesisir ba landskap tebing tasik ti narit ati ba Miri.
“Program sekali tu dikeandal nyendia peneleba muzikal ti nyelai ngagai bala pengusung baka taun-taun sebedau tu,” ku iya.
Karim mansutka jaku nya lebuh teks jaku iya dibacha Sekretari Mendam Opis Menteri MTCP, Datuk Sherrina Hussaini ba aum pemberita MCMF ditu, kemari.
Iya madah, MCMF deka nyadi pengerami muzik menua pesisir enggau barat keterubah ba Malaysia sereta patut nyadi program ninting taun.
“Pekara tu dikeandal ulih nambah penatai bala temuai sereta nempa Miri ukai semina nyadi mengeri ngelantang ati ti maju tang nyadi hab ngatur program antarabansa,” ku iya.
Nangkan nya, bisi semilan pemerindang ari Amerika Syarikat, Vietnam, Malaysia enggau raban ari Sarawak deka ngerichahka panggau MCMF taun tu.
Kelimpah mandangka pemerindang muzik ti narit ati, pengerami nya deka dirichahka agi nengah bemacham eksibisyen sereta bansal nyual pemakai enggau ai irup ngagai bala pengusung.
Bansal pengerami nya nyengkaum mandangka kraf, seni enggau pemakai lokal ti meri peneleba nyelai ngagai pengusung ngambi ngasaika penyelai main asal dia.
MCMF mega deka bejalaika inisiatif tanggungpengawa sosial korporat (CSR) nengah Projek Bup ungkup pemansang literasyen komuniti menua pesisir.
Siti agi program besai ungkup pengawa ngintu genap taun pengerami nya baka pengawa ngatur Program Belanda Ria Lima Kilometer pechuma ngagai mensia mayuh.
