Mensia mayuh bela mupuk pulai ke mengeri

KAPIT: Pengudah abis kemisi beserimbai enggau pengerami Hari Gawai sereta Hari Raya ngujungka pasar Kapit dedat laban pemayuh mensia ti bela berengkah mulaika diri baru ngagai mengeri tauka palan sida gawa.

Tambah mega sekumbang jalai ari Batang Balleh enggau Kapit ke Sibu udah ulih ditengah mensia mayuh taja hari bisi ujan lalu jalai bisi lichau mimit tang nya nadai ngasuh mensia mayuh rawan mulaika diri ngagai menua ketegal gagit ngintu pengerami.

Pia mega tinjau pemberita ba Terminal Ekpres Kapit udah mupuk sekut enggau pemayuh orang mulai kediri nengah perengka pengangkut sungai baka ekpress.

Kelimpah ari nya, sida ke mulai kediri gawa ngagai menua bukai sama mega mupuk bebeli ke tiket dua hari sebedau hari mulaika diri nangi ke enda ampit utai ditepan.

Enda kurang mega, dia jalai darat ari Kapit ke Sibu udah penuh enggau mensia mayuh bebai ke kerita enda ngira 4WD tauka pengangkut bukai nengah jalai kebun sawit.

Tu entara siti jalai alternatif diguna peranak menua tu mulaika diri taja jalai apin tembu digaga.

Mensia mayuh ti mulaika diri dilalau sama bejimat lebuh betengahka jalai darat tauka ai lalu patut nyaga pengelikun diri ba rantau jalai ngambika bela selamat datai ba endur ke dituju.

MUPUK PULAI KE MENGERI…Mensia mayuh berintai nganti gintir diri tama ngagai ekspress.