SIBU: Program Meresa Riman Tusu Mindah Kin Kitu ti diatur Opis Pengerai Nengeri Sarawak (JKNS) nengah kerejasama Kaunsil Riman Menua (MAKNA) deka diatur ba dua palan di Sibu ba bulan tu.
Pengari ari Unit Pengelaku Pengerai Sibu madah, pengawa meresa keterubah deka diatur di Opis Pelilih Kanowit berengkah ari 22 nyentuk 24 November tu.
Iya madah, pengawa meresa kedua deka diatur di Klinik Pengerai Sibu Jaya kena 25 nyentuk 28 November tu.
“Jam operasyen kededua pengawa meresa nya berengkah dibuka pukul 9 pagi nyentuk 5 lemai,” ku iya ba sebengkah penerang empai lama.
Iya madah, rambau program nya diatur, bemacham pengawa meresa deka dipejalai baka mammogram, ultrasound, meresa klinikal tusu, meresa iFOBT enggau pemandang riman dikena nambah penyedar mensia mayuh pasal empas enggau chara nagang riman.
Tampung iya, pengawa meresa nya pechuma ungkup raban B40 lalu bebayar ungkup raban ti ukai B40 nyengkaum sida ti datai ari klinik peribit tauka serikat korporat.
Terang iya, program tu diatur dikena meri peluang ngagai orang indu kelebih agi ba menua pesisir meresa tumu riman tusu.
“Riman tusu agi nyadi pun pemarai orang indu di Malaysia lalu berengkah ari taun 2018, program meresa mammogram udah dikerembai ngagai menua ulu di Sarawak.
“Tu dikena nentu orang indu ti muntang ditepan igi penyakit riman tusu tu ulih bejalaika pengawa meresa taja fasiliti pengerai jauh ari endur sida diau,” ku iya.
