BINTULU: Kaban Kunsil Nengeri (Adun) Samalaju Majang Renggi meransang bala pengajar enggau naka ulih nambahka kualiti pelajar bala nembiak ba sitak nya.

Ku iya, pekara tu seriris enggau tuju Perintah Sarawak nyapai status nengeri maju manggai taun 2030 kelimpah nyikap pengereja profesional ngambi ngerebut peluang pengawa disediaka diatu.

“Baka jaku disebut Kepala Menteri lebuh iya ngabas taba projek loji methanol kena Hari Empat tu tadi, Bintulu deka nyendiaka 74,000 pengawa puang nengah Hab Petrokimia Sarawak,” terang iya.

Majang mansutka jaku nya ba pengawa nyuaka bantu baucher uniform sekula Yayasan Sarawak ba bilik aum Opis Residen, ditu kemari.