KUCHING: Minggu Langkar Tengkebang Sarawak 2023 ti keterubah diatur udah ngempung mayuh raban industri profesional enggau peminat produk langkar tengkebang.

Diatur nyentuk 16 Februari tu, mayuh artis menua mega ngerichah Minggu Langkar Tengkebang Sarawak dikena mandangka produk kreatif ti udah ditengkebang sida.

Lebuh ngabas reruai Minggu Langkar Tengkebang Sarawak 2023 ba Palan Aum Borneo Kuching (BCCK), pemberita Suara Sarawak temegah meda asil dero digaga Mandal Presiden Artis Sarawak, Gerald Goh.

Iya udah mandangka dero digaga iya empu baka gambar indu Bidayuh ngena kalai temaga ba lengan enggau betis dikumbai ‘Ring Lady’.

RING LADY

Ku iya, indu Bidayuh nya nyadika peransang iya nempa dero ti nyelai laban iya rindu med achara indu Bidayuh nya ngena tinchin temaga ba lengan enggau betis sida kenyau ari mit.

“Nya mih pekara ti mesti dijaga kitai laban apin ditemu enggau deka punas enti enda dijaga manah,” ku iya.

Berebak enggau nya ku Goh, entara chara nyaga pesaka asal nya nengah seni.

NYAGUKA PESAKA SENI

Mandangka Ring Lady nyadika subjek dero iya, Goh madahka iya udah ngerandau sereta betanyaka penemu sida.

Nya kebuah, Ring Lady nya madah, rebak baru diatu enda ulih nali pengawa bekenaka tinchin temaga ketegal gaya pen- gidup nyau moden.

“Siti ari chara ngetanka pesaka asal tu iya nya nengah dero baka dikereja aku diatu.

“Kebuah pia laban ari dero nya rebak biak nemu sereta ngelala turai sejarah Ring Lady tu.

“Tu meh pekara ti patut dikemegah laban menua tu bisi urung 30 raban etnik.

“Enti sema pesaka asal tu dikurang, sayau endar lalu ngujungka rebak dudi enda ngelala sereta enda nemu pemayuh etnik di menua tu,” terang Goh.

Ngelansa pasal pengerami nya, iya muji pengatur Sarawak Design Centre laban udah bejalaika inisiatif dekaka sektor langkar tengkebang industri tu majak dikelala sereta disungkak.

“Enti deka maju, mayuh agi inisiatif mesti dikereja dikena nengkebang tauka ngena utai dikemisi kitai ba Sarawak nentuka produk meruan enggau dikelala ba dunya,” terang iya.