KUCHING: Opis Menteri Pengangkut Sarawak (MOTS) merambu nambah penyampau Taman Trafik di selampur nengeri tu nyadi siti inisiatif ngerembai pelajar pengelikun jalai alun kelebih agi ba raban nembiak sekula.
Menteri MOTS, Datuk Seri Lee Kim Shin madah, naka diatu, Sarawak semina ngembuan enam Taman Trafik ti ditumbuh khas ungkup ngajar bala nembiak mit pasal undang-undang jalai alun.
Iya madah, MOTS meri agih belanja ngagai raban bekuasa lokal (PBT) nyengkaum kaunsil mengeri dikena ngemanahka agi fasiliti di enam taman nya.
“Nya alai, opis menteri aku merambu nambah Taman Trafik sereta nentu taman tu ditumbuh ba genap bagi menua di selampur Sarawak ba baruh Langgur Pemansang Malaysia Lumpar Ke-13 (RMK-13),” ku iya.
Kim Shin mansutka jaku nya pengudah ngelanchar Pekit Trafik Sarawak (STG) Kuching 2025 di Taman Trafik Kenyalang ditu, sehari tu.
Tampung iya, inisiatif nya ulih meransang semua sekula ba genap bagi menua ulih begulai masuk pekit nya ti deka diatur dudi hari.
Inisiatif nya mega, ku iya, deka meri pemaik ngagai genap sekula ba genap bagi menua masuk pekit trafik ba renggat bagi menua sida empu kelimpah narak budaya likun kenyau ari mit.
“Timbal ti diterima bekaul pengawa ngatur program tu chukup ngemantup ati.
“Ba taun nyin kemari, kitai ngatur pekit tu di Miri, udah nya di Sarikei lalu taun tu di Kuching.
“Timbal ari bala nembiak mit chukup manah laban tu ukai semina main tang simulasyen gaya ti amat ba jalai alun ti disikap enggau penatai polis trafik sereta atur saman ba genap penyalah,” ku iya.
