MP GPS meseti berani bejakuba renggat Perintah Besai

PUSA: Kaban Parlimen (MP) Gabungan Parti Sarawak (GPS) besemaya deka berani agi bejaku ba renggat Perintah Besai nitihka pengarap ke udah diberi rayat.

Kaban Parlimen Batang Lupar Dato’ Sri Rohani Abdul Karim ngaku tanggungpengawa majak berat bekau ubah politik udah Pengawa Bepilih Besai ke udah.

“Taja pia, laban ke nyadi pengari rayat udah dipilih, aku enggau bala kaban parlimen GPS ke bukai ngasai mandat ari rayat nyadi tanggungpengawa ke patut digaga.

“Nya alai, sada nyawa kami meseti nyarih agi dalam mantaika peminta rayat. Taja berat tang patut disan ke pemaik semua,” ku iya.

Iya madah munyi nya rambau bejadika program Jom Berambeh @ Parlimen Batang Lupar berambaika jaku ‘Kamek Sayang Sarawak’ di Dataran Tandang Sari, kemari.

Rohani ngasaika program Jom Berambeh enggau sukung ari mayuh ejensi perintah betuju nanggam agi kaul penempa polisi perintah enggau rayat.

“Nyadi nengah program sehari tu kitai deka mai ejensi perintah sama datai ngabas rayat seraya meri servis.
“Ari nya ila kitai ulih nemu timbal ari ejensi bekaul sereta rayat ngambika dibantai ba parlimen. Nya alai, aku ngasaika program tu beguna amat lalu patut mayuh timbal ke manah ari pengari rayat enggau komuniti,” ku iya.
Iya berebak enggau nya meri terima kasih laban sebagi ari Parlimen Batang Lupar dipilih nyadi sitak pemansut pemadu besai asil pemakai di Sarawak jemah ila.

Iya mega madah nengah sukung enggau bantu ulih nentuka juluk nya nyadi nyata.

CHAMPION… Rohani Abdul Karim nyuaka perais ngagai siku pemenang pekit main asal beserimbai eggau program Jom Berambeh @ Parlimen Batang Lupar di Dataran Tandang Sari, kemari. Gambar OSMAN RAZALI

Suara Sarawak