KUCHING: Isu infrastruktur enggau nambah penemu mensia mayuh nyadi penekul ti pemadu besai ba pengawa ngintu teda di Sarawak kelebih agi ba sukut penerit adat.

Kaban Kunsil Nengeri (ADUN) Baleh, Nicholas Kudi Jantai madah, penyampau pegawai penerit adat PBT kelalu mimit dibanding pemesai dandang menua Sarawak.

Ku iya, penyampau tubuh ti gawa enda tetangkupka peminta kelebih agi di kandang menua ulu ti ngasuh atur matau pengawa bebuaika uras nadai pemendar mar dipejalai.

“Penanggul tu ngujungka mayuh kes rampa menua kamah enda ditemu tauka diatur enggau lengkas.

“Agi mayuh PBT bepanggai ba sebana manual dalam mutarka kes muai uras, tang teknologi moden baka CCTV, dron, dashcam lori uras enggau sistem GPS bedau mayuh dikena.

“Pengelemi ngena teknologi tu ngujungka mayuh pengawa matau ba luar enda komprehensif,” terang iya.

Kudi nerang pekara nya lebuh bejuraika Rang Undang-Undang Ngintu Pengeraja Meruan enggau Teda 2025 ba Aum Kunsil Nengeri (DUN) Sarawak Ke-19 ditu, kemari. Ku iya, taja undang-undang enggau ukum ti udah bisi udah ditetap, tang tikas pematut agi baruh laban proses ngempung ‘bukti’ mayuh penekul.

“Kelimpah ari nya, pengawa bedawa begunaka timpuh ti lama, lalu ngujungka kitai tusah deka neritka atur enggau manah. “Diatu kitai nadai bisi mekanisme ngaga ripot komuniti ti muntang sereta jampat kelebih agi di menua pesisir taja pengawa tu meri empas ngagai pengulih nyidi pengawa ngelanggar atur bekaul enggau pengawa muai uras nadai pemendar.

“Peranak di menua pesisir napi penanggul mantaika sebana sereta ngeripot pengawa salah nya enggau manah,” ku iya nyemetak.

Dikena mutarka pengelemi nya, Kudi merambu raban bekaul ngena dron, sistem CCTV pintar enggau GPS dikena nambahka pengawa matau.

“Kelimpah ari nya, aku merambu numbuhka Unit Penerit Adat Rampa Menua Nengeri dikena mantu PBT ba pengawa matau operasyen.

“Aku mega merambu ngambika kontrak ngatur uras diterit enggau liabiliti ti terang, ngaga aplikasyen sebana rayat ti disikap ngena geotag sereta numbuhka wang turu khas dikena neritka atur,” ku iya.

Kudi ngarapka atur ti terit agi sereta moden baka Rang Undang-Undang Ngintu Pengeraja Meruan enggau Teda 2025 nya ulih nyapai juluk sereta ngubah paradigma ngatur uras di Sarawak ari pengawa muai uras ngagai pengawa ngatur, ngena baru sereta ngintu pengeraja asal.