SARATOK: Nyau deka 400 hektar udah ditanam rian bansa Musang King enggau Black Ton ba Projek Nanam Rian Musang King ditu.
Sapit Menteri Pengeluar Kuasa enggau Pengeraja Asal, Ali Biju madah, kandang menua ngaul diri ba projek tu iya nya Jaong Awik, Tembawai Kapok, Semambu Kabo, Kawit enggau Nanga Ibus.
Ku iya, projek pemungkal tu kebendar dikena ngerandang mayuh agi projek sebaka sereta dagang komersial rian ngagai makit menua luar baka menua China enggau Hong Kong.
“Kira udah mujur ba renggat keterubah tu ari perati aku, galak endar tambak rian ke ditanam kita ditu, nyau mayuh udah tinggi ari kitai besai tuai.
“Berasai gaga ati meda pemujur bala kita lalu aku ngarapka tu ulih meri peransang ngagai bala bukai ba renggat entudi tu. Utai baka tu ke patut ditunda kitai.
“Nyual rian tu nadai penanggul laban endang ditemu berega. Enti dijual sebelah tisi jalai, RM40 ngagai RM50 sekilo. Enda ibuh nyampau nya, nama bisi RM20 sekilo udah umbas endar rega diterima.
“Ba Semenanjung din, enti nuan bisi kebun rian 10 hektar, tau dikumbai orang kaya (jutawan). Tu endang amat, nya alai aku berandau enggau sida ke bisi nanam rian tu din madah deka nanam di Sarawak, ba kitai Saratok ditu.
“Tanah pemadu beguna. Tanah kita enda tau enda engkeman endur nanam rian. Nya kebuah aku tu berat-rat nanyaka tanah kitai ditu manah tauka enda endur nanam rian laban enti tanah manah, mayuh agi rian ulih ditanam, lalu mayuh asil ulih dikeluar jemah” ku iya ti mega Kaban Parlimen Saratok.
Ali mansutka jaku tu lebuh berandau betunga enggau bala pekebun Projek Pemungkal Nanam Rian Musang King Bebala Mayuh ba Kawit betuaika Desmond Jemeni ditu, ensana.
Berita penuh Ruai 8 pagila.
