Musin dabai, peluang pedaja nambahka jereki

KOTA SAMARAHAN: Buah dabai tauka nama saintifik iya Canarium odontophyllum siti ari bansa buah ti chukup tebilang kelebih agi di Sarawak.

Baka buah rian, buah dabai semina bisi nitihka musin.

Rega buah dabai kekadang manggai RM50 sekilo lalu tu endang ulih nambahka penatai pemisi sida ke bedagangka buah tu.

Buah dabai tu mega dikelala enggau juluk buah kurma chelum Borneo berindik ari chura ti nyau deka sebaka enggau buah nya taja asai iya bebida.

Siku orang ke bedaja buah dabai, Noorharyanni Hendery, 25 madahka diri ngepunka pengawa bedaja buah nya sepengudah nyera buah nya lebuh ngandung.

NOORHARYANNI HENDERY

Ku iya, iya chukup rindu makai buah nya nyentukka iya ngepunka pengawa bedaja nengah tali arus.

“Aku bulih bekal buah dabai tu ari menua aku empu di Simunjan.

“Aku deka ngambi lebih ari 100 kilogram (KG) sekali ngangkat ngambika ulih dijual ngagai orang,” ku iya madah ngagai Ruai, Suara Sarawak.

Noorharyanni ke mega asal ari menua Simunjan madahka, dagang buah dabai diatu nerima peminta ti chukup manah ari mensia mayuh.

Ku iya mega, iya enda ngadang mayuh orang rindu sereta ngiga buah dabai nya.

“Peminta ari mensia mayuh endang sigi enda disadang laban pengawa bedaja tu baru berengkah dipejalaika aku,” ku iya nerang.

Nangkanka nya, Noorharyanni madahka ari sukut rega, buah dabai nya dijual nitihka gred buahnya empu.

“Enti saiz buah nya mit, buah dabai dijual ngena rega ti murah lalu bakanya mega enti saiz iya besai, buah nya deka dijual enggau rega ti bebida,” ku iya.

DIANA DAVID

Noorharyanni madahka, kebuah pia laban rega borong buah dabai nya mega bebida nitihka gred.

“Paling murah aku nyual RM22 ungkup 500 gram (g) lalu RM40 ngagai RM45 enti sekilo,” ku iya madah.

Berindik ari peminta buah dabai ti chukup mayuh, Noorharyanni madahka bisi sekeda ari mensia mayuh meli urung sekilo tauka lebih arinya.

“Bisi mega sida ke meli 500g aja, tang enda mayuh. Landik agi sida bebeli lebih ari sekilo,” ku iya nambah.

Lebuh dirandau bekaul enggau chara nyual buah dabai nya, Noorharyanni madahka iya semina nyual nengah tali arus lalu ngaga servis nganjung ngagai rumah sida ke bisi meli.

Taja iya bisi ngaga servis nganjung buah dabai ke rumah, tang bisi mega sekeda ari sida ke meli sanggup datai kediri ngagai rumah iya lalu ngambi buah dabai ke udah tembu dibungkus.

“Kekadang lebuh nganjung buah dabai ngagai sida ke meli, aku deka meri caj nitihka endur ke dituju.

“Kelimpah ari Saramarahan, aku mega bisi nganjung ngagai Kuching, tang enda mayuh laban aku ngena servis grab lebuh nganjung buah nya ngagai sida,” ku iya madah.

Noorharyanni mega nusi endang mayuh pemar ditapi lebuh bedaja kelebih agi maya betemu enggau sida ti bebelika buah dabai.

“Kekadang bisi sekeda sida enda sabar nganti enti aku laun nganjung buah dabai ngagai sida nyentukka sida nginsil udar sida.

“Aku enda ulih berumban nganjung udar ngagai genap endur ti bisi minta laban peminta ti chukup mayuh lalu ditambah mega enggau aku ti benung ribat.

“Tang enti bisi sekeda sida nginsil udar buah dabai nya, aku deka nyual baru buah nya ngagai sida ke amat keran deka meli buah nya,” ku iya.

TEMBU DIBUNGKUS… Buah dabai ke udah tembu dibungkus Noorharyanni ngambika ulih dianjung ngagai rumah sida ke meli.

Kelimpah ari enda tan nganti lama, Noorharyanni mega madahka bisi sekeda orang ke meli ti enda mayar buah dabai ke udah dianjung tang nya endang udah sebagi ari pait manis ba pengawa bedaja.

Berebak enggau nya, siku orang bedaja buah ba Makit Bandar Riyal ditu, Diana David, 31 madahka iya ngambi bekal buah dabai ari pembekal ti dikelala nyengkaum ari Indonesia, Sibu enggau Sarikei.

“Aku enda berani ngambi buah tu mayuh, urung 100kg ngagai 200kg sekali ngangkat.

“Kebuah pia laban buah dabai tu enda tan lama lalu ulih lemi enti kelalu lama diperam.

“Dalam 200kg nya, kekadang bisi 10kg enda ulih dijual. Enti enda dijual, laluh nya lagi deka dikelauk diri sebilik tauka dijual murah,” ku iya.

Ku Diana, taja Covid-19 nyadi ba serata menua, tang peminta ari mensia mayuh kelebih agi ba pelilih Kuching enggau Samarahan chukup mayuh laban pengawa neresa pelilih menua agi enda dikemendar lalu nadai mayuh buah dabai ba menua tu.

Sebeka enggau Noorharyanni mega, Diana madahka iya nyual buah dabai nya nitihka gred.

“Pemekal ti nganjung bekal buah dabai ngagai kami mega ngeletakka rega buah nitihka gred.

“Rega aku nyual ngagai orang enda kelalu mar iga, laban enda semua sida ke deka meli buah dabai ulih meli buah tu enggau rega ti mar,” ku iya seraya madahka mensia mayuh deka meli buah dabai urung 500g ngagai 1KG ba iya.

Ari sukut chara nyual, Diana rindu agi bejual buah dabai ba makit Bandar Riyal.

Taja pia, iya mega bisi ngaga servis nganjung buah dabai ngagai rumah sida ke meli kelebih agi sida ke diau jauh ari genturung Bandar Riyal ngena servis grab.

Kelimpah ari dabai, Diana mega bisi bedaja buah bansa bukai enggau mayuh macham bansa sayur kenyau ari enam taun ke udah sepengudah iya badu bekuli.

NYAMAI DIEMPA… Isi buah dabai ke lunak sereta belemak ngasuh asai buah tu dikerinduka orang.

Nambahka nya, iya madahka endang mayuh pemar lebuh bedaja buah dabai kelebih agi rega buah nya ti agi mar naka ke diatu.

“Bisi sekeda ari sida ke meli manjung lebuh meda rega buah dabai kelalu mar.

“Kelimpah ari nya, bisi mega sekeda kelalu milih, pegai lengka lalu udah nya enda nyadi meli.

“Tang kami enda ngambi ati laban nya endang adat bejual,” ku iya nusi.

Asai buah dabai ti lunak ngasuh buah tu nyadi siti ari buah ti chukup dikerindu.
Sekeda orang rindu makai buah dabai ngena kicap, garam, tauka gula sepengudah direndam ba ai umbas iya pengangat.

DABAI SARAWAK… Buah dabai ti dijual Diana ba makit Bandar Riyal ditu.

Siku ari orang ti rinduka buah Dabai, Carolyn Philip madahka rega buah dabai endang chukup mar naka ke diatu nyentukka iya berunding manah sebedau bebelika buah nya.

Taja pia ku iya, ketegal tenguk nyepi asai buah ti enda seruran bisi nya, iya semina meli mimit aja dikena mantupka tenguk.

“Aku rindu agi enti buah dabai diengkah dalam plastik lalu dijembi ba mata panas.

“Pengangat mata panas ngasuh asai buah tu bebida agi ari ke direndam ngena ai angat,” ku iya nusi peneleba iya ngintu buah dabai.

Kelimpah ari diempa pia aja, buah dabai mega digaga nyadi produk pemakai ke bukai baka kerupuk, dabai beku, jus, pes dabai, sekelim enggau ke bukai.

Sida ti rindu tauka deka bebelika buah dabai kelebih agi ba pelilih Samarahan tau betelipun ngagai Noorharyanni ba lumbur 011-12678105 tauka datai ngagai makit Bandar Riyal empu enti sema deka bebelika buah dabai ari Diana.

Suara Sarawak