KUCHING: Chukai Assessment di Sarawak entara pemadu mit laban nadai kala berubah kenyau ari taun 1970 taja ungkus operasyen enggau servis perintah niki sepanjai timpuh nya.
Sapit Premier Sarawak, Datuk Amar Prof Dr Sim Kui Hian bechunto ke penyampau entepan kerita di Sarawak agi dicaj 20 sen ba tetiap kaunsil lokal taja udah bepuluh taun. Ku iya nerang, mayuh kaunsil lokal ba sekeda nengeri bukai udah niki chukai assessment sida nyentuk caj entepan kerita nyau manggai RM1 sejam diatu.
“Tang nama kebuah kitai ngadu semua tu, laban semua kaunsilor enggau semua raban ti bekaul bendar mantu rayat, nentuka ungkus belanja idup enda niki,” ku iya.
Dr. Sim nyebut pekara nya ba Pengerami Anugerah Opis Menteri Pengerai Mensia Mayuh, Pengawa Berumah enggau Perintah Lokal (MPHLG) ditu, malam kemari.
Berebak enggau nya, iya ngelalau raban kaunsil lokal majak netapka standard tinggi kelebih agi ba pelin tunga kuing Juluk Pemansang Meruan (SDG) ti dipejalai di Sarawak.
Iya ti mega Menteri MPHLG nerang, pejalai pengawa endang udah ngelui pukulrata nasional tang meseti nentapka standard nya ke dipadah standard ‘Kampung Borneo’ ke tinggi agi.
“Pekara pemadu beguna iya nya Juluk SDG Sarawak sekali ke ba kaunsil mengeri tauka kaunsil pelilih menua pesisir ngelui pukulrata nasional. “Nama reti ngelui pukulrata nasional?
Reti nya, kitai manah agi ari 50 peratus, enti enda tinggi agi.
“Standard ‘Kampung Borneo tu beguna laban lebuh Sarawak mansang ke mua, manggai 2030 Sarawak deka bebida agi ti dibanding diatu,” terang iya.
Sama datai, dua Sapit Menteri MPHLG Datuk Michael Tiang Ming Tee enggau Datuk Dr Penguang Manggil; Sekretari Mendam MPHLG, Datu Elizabeth Loh; Datuk Bandar Kaunsil Mengeri Kuching Selatan (MBKS), Datuk Wee Hong Seng enggau Chairman Kaunsil Mengeri Padawan (MPP), Cr Tan DR SIM KUI HIAN Kai. -EDISI UKAS
