BELADIN: Perintah Sarawak nengah Opis Pengintu Pengelantang Komuniti (JKM) Sarawak nyendia agih belanja dikena mantu pesakit ti beguna kos berubat besai baka beputung tauka meli kereban sukung khas.
Sapit Menteri Pemansang Indu, Nembiak Mit enggau Pengelantang Komuniti, Mohamad Razi Sitam madah, bantu nya ungkup komuniti ti ngembuan penatai pemisi baruh ari rintai penyeranta iya nya RM1,169.
Ku iya, Premier Sarawak, Datuk Patinggi Tan Sri Abang Johari Tun Openg chukup betati ke guna raban nya ti napi pemar tauka enda ulih nangkup kos berubat besai.
“Nya alai, kitai bisi nyendia agih belanja tu ba baruh JKM Sarawak ti dikemendar Premier Sarawak.
“Sebarang pesakit ti beguna kos berubat besai enggau ngembuan penatai pemisi baruh ari rintai penyeranta, diperansang minta bantu tu.
“Pekara ti ngirau ati aku, mayuh orang enda nemu senentang bantu tu. Nya alai, aku ngarap bala tuai komiti ba renggat baruh bekunsi pekara tu ngagai semua orang,” ku iya.
Iya madah, atur pengawa minta bantu nya nengah Opis Pengintu Pengelantang Bagi Menua (PKMB) sebedau dianjung ngagai aum khas renggat opis menteri ngambi dikemendar.
“Tu mungkur semua pesakit mata, pending, buah punggung, tungkul ati enggau ti bukai tang meseti bekaul pengawa beputung tauka bebeli perengka sukung khas.
“Taja pia, pekara tu meseti dikenuku pegawai berubat (lutur),” terang iya.
Razi mansutka jaku nya rambau bejadi Program Sejambak Kasih Hari Raya Aidilfitri 2023 Renggat Bagi Menua Betong (ungkup Dun Beting Maro) ba Balai Masjid al-Amin, ditu tadi.
