KUCHING: Perintah Sarawak enggau Petroliam Nasional Berhad (PETRONAS) majak ke pengawa beberika bantu nyengkaum kereban berubat.
Sapit Premier Sarawak, Datuk Amar Profesor Dr. Sim Kui Hian datai ngemata pengawa meri bantu ngagai Klinik Pengerai Batu Kawa, ditu ensanus.
Ku iya, tuju bantu kereban berubat nya dikena nyaup nyungkak tikas pengidup enggau servis pengerai menua pesisir.
“Pengawa tu kelai kerejasama strategik sektor korporat enggau perintah nengeri ba pengawa ngenegap sistem pengerai mensia mayuh.
“Pemeri keberan berubat ari PETRONAS tu ukai semina kelai aja tang madah pengeransing deka nyaup negap sistem pengerai mensia mayuh,” ku iya.
Dr. Sim mega madah, sektor pengerai nyadi pengering enggau pugu pemansang Sarawak kelimpah pekara pelajar lalu begunaka kerejasama semua.
“Taja guna sektor pengerai tu besai tang nengah kerejasama strategik kitai ulih mai ubah nyema semua rindu besaup enggau pangan diri,” ku iya madah baru.
Dr. Sim madah, pemeri nya nyengkaum mesin ultrasound, MacroView Plus Otoscope, vascular doppler sereta kereban berubat ke bukai.
Kelimpah ari nya, ku iya, kerejasama PETRONAS enggau Gerempung Pengasih Bala Bini Menteri Sarawak (SABATI) sereta Opis Pengerai Nengeri Sarawak kenyau ari 2023 udah meri pemaik ngagai 17 klinik pengerai menua pesisir lalu 26 da klinik deka nerima bantu beungkus urung RM1.3 juta di selampur Sarawak.
Sama datai, Sapit Presiden III ti mega Sekretari Dipebasa SABATI, Datuk Enn Ong Siok Ean, Pemangku Presiden SABATI, Datuk Doreen Mayang Uggah, Menijar Besai Kaul Nengeri, Anuar Ismail, Pegawai Pengerai Sitak Kuching ngari ke Direktor Opis Pengerai Nengeri Sarawak, Dr. Johnny Pangkas sereta ke bukai. – EDISI UKAS
