Nembiak, raban B40 dikemansang nengah pelajar pengelandik

KUCHING: Kaul kerejasama rat ulih mai pemansang ngagai menua kelebih agi ba pekara pelajar.

Ari nya, Ketuai Pemesai Eksekutif Kuching Skills College, Novert Sullang ngena peluang berandauka pekara pemansang pelajar pengelandik begulai enggau Adun Tamin, Ir. Christopher Gira Sambang.

Randau nya diatur nyerumba pejalai nemuai Novert ngarika kolej sida ngagai opis Gira empu ditu, kemari.

Lebuhka berandau ku Novert, mayuh anak penemu enggau buah runding dikunsi kelebih agi pasal pemansang raban nembiak enggau raban B40 kelebih agi ba sitak dipegai Gira.

“Mayuh endar utai dikunsi kami duai lebuhka berandau lalu aku tepantup ati ninga tibar penemu ari siku pengari rayat ti chukup siru enggau betatika nasip rayat.

“Kami duai bisi nyebut pasal sekeda ari chara patut diperunding dikena mantu raban B40 nengah pelajar enggau latih pengelandik baka kus ti bisi disedia ba kolej kami,” ku iya lebuh dirandau Suara Sarawak.

Novert madah, kitai bela nemu kereja ngaul pengelandik diatu nerima mayuh peminta ba makit kereja kelimpah nyendiaka bayar gaji tinggi.

“Penemu dikunsi Gira pasal pemansang raban nembiak ba sitak dipegai iya kebendar mai kitai sedarka peranak menua pesisir diatu udah muka runding lalu nerima ubah dibai perintah.

“Gira mega bisi madahka juluk ati diri deka nempa kaul kerejasama enggau Kuching Skills College ngatur sekeda kus ungkup raban nembiak enggau raban B40 ba sitak Tamin udah tu,” terang Novert.