Ngangkat Kuntau ungkup rebak baru

KUCHING: Raban Serakup Seni Ngetanka Diri Dayak Sarawak (SDMAA) ditu ngembuan juluk besai ba singkang pejalai sida.

Sida keran ngangkatka seni ngetanka diri Iban disebut Kuntau ngambika bisi ditampung rebak baru.

Nitih ku penerang ari Sekretari Besai Abraham Melai, tu sebagi ari tanggungpengawa besai disan sida nentuka pesaka asal bansa nya enda mudah lenyau ngapa.

“Kitai dekaka rebak baru belajar enggau ngiri penemu pasal Kuntau Iban ti nyadi sebagi ari seni ngetanka diri ke bukai baka Tae Kwon Do, Tang Soo Do, Karate enggau Muay Thai tauka Hapkido ti udah bisi penuduk entap diatu.

“Kitai mega sedarka tu ukai pengawa ti muntang dikereja laban kitai nemu iya ngaul raban nembiak ti idup ba dunya mansang, tebal agi bekenaka teknologi.

ARAPKA MUJUR… Uggah nyuaka chek ngagai Abraham ungkup belanja pejalai sida ngulu Pengerami Seni Ngetanka Diri Dunya 2019 Chunju Ke-19 berengkah ari 26 Ogos ngagai 6 September tu.

“Nya alai, nentuka kitai ulih nyaga enggau ngintu seni Kuntau tu, kaul enggau raban nembiak patut ditempa sereta ditanggam rat,” ku Abraham madah nyemetak.

Berindik ari nya ku iya, kitai patut ngaluska agi chara matih enggau ngajar sida ngambika pelajar muntang diterima sereta berurun lalu mai pemaik ngagai pengerai enggau pengeregas tubuh.

“Ba penemu aku, endang patut kitai ngena chara sains lumba enggau main baka ngangatka isi dulu, kering batang tubuh, isi begumpal kelimpah matih penyikar enggau pengelanchat sida bekuntau,” ku iya nerang.

Enti semua tu mujur dipejalai ku iya, guro kuntau ulih ngajar apus hari sereta ulih diangkat nyadi batang pengawa sida.

“SDMAA tu sebagi ari serakup ti udah diaku nyadi kaban ba Gerempung Serakup Seni Ngetanka Diri Dunya (WoMau).

NGARIKA SARAWAK… Raban SDMAA temegah ati ulih ngangkatka Kuntau ba mata dunya.

“WoMau tu bebakih enggau Unesco (Status Konsultatif) enggau Penyanding Penemu ngagai raban Gempung Ukai Dikuasa Perintah (NGO) ba Komiti Antara Perintah ungkup Nyaga Pesaka Asal Enda Nyengala,” ku iya nampung.

Naka diatu, gerempung serakup sida bisi 62 kaban ari 42 bengkah menua, ku Abraham ti mega siku ari guro kuntau.

Iya mega madahka SDMAA udah mayuh ngambi bagi ba gempuru besai baka tu ke alai enti nadai penanggul lalu ukai deka bejaku besai, sida nagit mai pengerami tu kitu jemah.

Dulu ari nya, iya nerima chek RM 50,000 ari Sapit Kepala Menteri Sarawak Datuk Amar Douglas Uggah Embas ungkup belanja pejalai raban kuntau ngulu Pengerami Seni Ngetanka Diri Dunya 2019 Chunju Ke-19.

“Pejalai kami sekali tu deka ngulu pengerami Seni Ngetanka Diri Dunya 2019 ke dua di Chungju, Utara Chungcheong Korea Selatan berengkah ari 26 Ogos ngagai 6 September.

GAH BA MATA DUNYA… Antara kenang manis mantaika kuntau ba Aum Besai Ninting Taun Ke-15 WoMau 2016 di Chunju Korea.

“Kami sebuat betubuh 20 iku datai ari guro kuntau, pengemeran kuntau, muzik asal enggau sida ti betanda.

“Kami deka mandangka pengelandik beraban enggau ngatika diri bepelasarka penau bekenaka senyata lama baka terabai, ilang, sangkuh, kerambit, sumpit enggau duku chandung,” lansa iya.

Abraham mega madahka SDMAA endang ngelalu enggau nerima raban kuntau bukai begulai enggau sida ngangkat enggau ngetanka pesaka asal bansa nya.

“Kita tau telefon tauka nganjung peminta ngagai kami lalu kitai ulih ngatur randau pasal pekara tu.

“Taja pia, pekara pemun patut diperati iya nya kuntau asal ti ditampung kenyau ari menya,” terang iya.

Berebak enggau nya, Abraham ti ngarika SDMAA meri terima kasih ngagai Uggah udah meri sukung kelebih agi ari sukut belanja ba pejalai sida ngagai Chungju.

“Kami ngarapka iya ulih datai ba pengawa nyuaka tambai Sarawak sebedau meleka kena 26 Ogos tu,” ku iya andal.

Ngelansa pasal SDMAA ditumbuh bala guro kuntau ti nampung seni ngetanka diri ari sida ke tuai dulu ti kering sereta kebal lebuh menua agi siga, bekayauka pala munsuh.

Belajar kuntau reti iya sida bisi penau nyaga pengelikun diri sereta landik bemain enggau jari sereta senyata.

Bungai enggau buah kuntau bebida bepelasarka penemu ti dipelajar enggau dipeturun ari siku-siku guro.

Ambika chunto, Bungai Menaul nunda chara enggau gaya penerebai menaul, penyikar enggau penajam perening dataika ulih ngelemika semengat munsuh.

Buah kuntau ngemai reti chara ngetanka diri ari kena serang baka sekeda gaya kuntau dikumbai Kuntau Bungai Lang, Kuntau Tembong enggau Kuntau Spring.

Jeman diatu nadai standard ti nyengala ba sistem tikas (gred) kuntau laban sida ti belajar kuntau suah agi dikumbai udah tamat enti nguasa semua bungai enggau buah bansa kuntau ti dipelajar.

Tebal agi bala nembiak tauka rebak baru diatu belajar bekuntau abis nadai setaun endur sida tamat.

Suara Sarawak