Pengawa nguasa penemu bekaul Ngepan Iban meseti ditarak ba rebak biak nentuka pesaka budaya komuniti Iban terus dijaga enggau ditampung ngagai rebak dudi.

Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan madah, pengawa nyaga pesaka budaya enda patut meri perati ngagai pengawa ngena ngepan asal aja, tang meseti digembar enggau pengawa mereti ke nama, guna enggau reti tiap keresa ti nempa identiti Ngepan Iban.

Ku iya, agi tubah orang ti ulih ngena Ngepan enggau manah, tang enda ngelala nama sereta guna keresa ti dikena nya lebuh pengawa nisih.

“Kitai ukai semina meseti nemu ngena Ngepan, tang mega mereti ke nama enggau guna tiap keresa ti dikena. Penemu tu mih ti deka nentuka pesaka budaya kitai terus dijaga enggau enda lenyau disegang arus pemansang jeman,” ku iya.

Snowdan madah munyi nya ba Pengerami Makai Lemai serimbai Pekit Kepenudi Keling enggau Kumang Raban Ngepan Iban (RNI) 2026 di Restoran Dinnerworld Bintulu, Hari Enam tu tadi.

Ku iya, komuniti Iban, Bidayuh enggau Orang Ulu meseti terus nambah penemu bekaul pekayan asal sida laban tiap komponen bisi sejarah, falsafah enggau reti budaya ti patut ditemu sereta ditampung ngagai rebak baru.

Iya mega madah, pengawa bekunsi penemu budaya beguna endar nentuka pesaka nya mengkang tulin lalu ukai semina nyadi elemen pengias tauka lambang ngena aja.

Nangkan nya, Presiden Serakup RNI, Steven Abas Patrick Agus madah, Pekit Keling enggau Kumang RNI ditumbuh ukai semina milih ikon ngepan asal, tang mega nyadi pelasar nambah penemu mensia mayuh bekaul adat, budaya enggau pesaka Ngepan Iban.

Ku iya, sekumbang 10 taun ngatur pekit nya kenyau ari taun 2016, RNI udah bejalaika bemacham inisiatif nyengkaum woksyop adat enggau latih ngena Ngepan nentuka tiap penyereta mereti ke reti budaya sebedau ngulu pekit nya.

Steven mega madah ke RNI 2026 nya edisyen kepenudi ngena format ke bisi diatu sebedau pekit nya ngena konsep baru belabuh taun baru ngambi nipak pemansang kemaya hari sereta matak mayuh agi pemekit biak.

Ba pekit nya, Wellingson Kulling dipadu nyadi Keling RNI 2026, seraya Arabella Sunta nyadi Kumang RNI 2026.

Pemenang bukai baka Luciano Deckers (Laja), Petrus Eddy (Bungai Nuing), Sharon Maxeca (Lulong) enggau Maria Makdalena (Selinggar Matahari).

Bela datai, Kaban Kunsil Nengeri (ADUN) Tanjong Batu, Johnny Pang Leong Ming sereta Sekretari Politik Premier Sarawak, Angeline Stephen Raja. — EDISI UKAS