KUCHING: Bisi 18 nembiak Sarjana Atur Pengawa Dagang (Antarabansa) ari Fakulti Dagang, Langkar Tengkebang enggau Seni Universiti Teknologi Swinburne Kampung Sarawak ngatur penemui ngagai Reka Jaya Plantation Sdn Bhd dikena mungkal inisiatif SwinSPINE inovatif.

Unit Konvenor, Dr Gabriel Wee madah, penemuai nya endang sebengkah pangku pengawa sida dikena nambah peneleba nembiak bekaul pengawa belajar.

“Nengah pengawa ngena penemu ba program ngaul terus tu ulih nempa pengawa belajar sida ti praktikal agi,” terang iya.

Nambah ke nya, penemuai nya dikena meri peneleba ngagai nembiak bekaul dinamik dagang dunya kelimpah belajar nanam kopi Liberica.

Kebuah pia laban nembiak bepeluang meda ngena mata sida empu pengawa nginjin kopi Liberica.

“Penemu penuh senentang sebengkah produk ba penemuai tu mujur meri penyedar ngagai kami senentang sekeda sukut bekaul produk.

“Tu beguna amat dikena nentu perambu strategik kami ungkup makit China,” ku siku ari nembiak nya.

Pia mega, nembiak ti datai ari bemacham menua nyengkaum Denmark, Zimbabwe, Indonesia, Malaysia enggau China nya deka ngaul diri ba projek industri pengelama enam minggu.

Projek nya mai nembiak mansik penanggul ba makit China, ngelala pengulih penanggul sereta ngemansangka pelin atur strategik ngambi produk kopi Liberica Reka Jaya mujur tama makit ti dimanik nya.

Ungkup rikod, projek industri enggau penemuai ngagai Ladang Reka Jaya nya bepelasar ke inisiatif SwinSPINE ti ditengkenang dikena narak pekara bekaul projek industri ba unit akademik kelimpah ngemerat peneleba ba dunya dagang ti amat.