KUCHING: Program Digital Village Accelerator (DiVA) enggau Sarawak SaaS Accelerator (SaSar) ukai semina program pemechut aja tang penyungkak strategik pemansang timpuh panjai nengeri tu.
Sapit Menteri Pelajar, Inovasyen enggau Pemansang Penau, Datuk Dr. Annuar Rapaee madah, program nya nyendia gaya berurun lalu pemungkal ulih ngerembai enggau bisi disiplin sereta tunga kuing ti nyengala.
Iya madah, sida meri peneleba ngagai penyereta ngagai mentor, sukut industri enggau pelaba ekosistem, mantu sida tuai runding nyadi pedagang enggau tuai.
“Ari sukut opis menteri, tu chukup beguna.
Program tu nyikap pelajar formal nengah pengawa ngerandang peluang inovasyen, dagang enggau belajar seumur idup,” ku iya.
Dr. Annuar bejaku munyi nya nengah teks jaku iya dibacha Tuai Opis Inovasyen Opis Menteri, Pelajar, Inovasyen enggau Pemansang Penau, Dr Cheong Yaw Liang lebuh Pemandang Inovasyen Startup di Tegas Digital Village ditu, ensanus.
Ba sukut nya, iya madah, serikat pemungkal ngesan pangku pengawa ti majak besai.
Ku iya, serikat pemungkal ukai semina pelasar numbuh dagang tang pelasar belajar, ngaga eksperimen enggau pemansang penau nyadi tuai.
“Nengah serikat pemungkal, anak biak belajar mutar penanggul, ngatur pekara ti enda tentu enggau meri timbal ngagai pengamat makit,” ku iya.
Tampung iya, nengah pengawa nyukung serikat pemungkal ba renggat tumu, program nya mantu nempa pengulih inovasyen lokal, meransang pengawa ngena teknologi meraka sektor sereta negap chara ngelaku komersial.
Terang Dr. Annuar, pekara nya mantu nyapai juluk Strategi Pemansang Pengudah COVID-19 (PCDS) 2030 nyungkak aktiviti ekonomi berega tinggi enggau nyendia pengawa puang bekualiti.
“Nengah embing bestruktur, pengawa ngaul ekosistem enggau peneleba makit, bala pemungkal majak nyikap diri ngerembai chara mutar sida ngelui ari makit Sarawak kelimpah ngerandang jalai ngagai makit serantau enggau global,” ku iya.
Tampung iya, pelasar nya nentuka Sarawak ukai semina nyadi penguna teknologi digital tang nyadi penengkebang, pengempu enggau pengeksport inovasyen kelimpah negap tikas semekih ekonomi enggau timpuh panjai.
