Munas penyeranta tagit besai Perintah S’wak

KUCHING: Pelin Indu Munas Penyeranta Sarawak deka ditumbuh Perintah Sarawak dikena mutarka isu penyeranta ba mengeri enggau menua pesisir.

Kepala Menteri Sarawak Datuk Amar Abang Johari Tun Openg mansutka pekara tu lebuh nyimpul jurai ba Aum Dun ke-18 ditu, tadi.

“Perintah endang keran mutarka isu penyeranta enggau ngelala strategi ti manah sereta nagit program dikena mantu sida ti seranta.

“Nya kebuah Pelin Indu Munas Penyeranta Sarawak dilanggur dikena mantu ruang bilik seranta di mengeri enggau menua pesisir ti deka bejalaika pengawa enggau program ti patut nentuka isu penyeranta teputar,” ku iya.

Ku iya, pelin tu ukai semina mansutka sida ari perekuh seranta belalauka Garis Penatai Pemisi Penyeranta (PLI) tang mega meri sida penau enggau penemu nentuka sida ulih idup ngatika diri jemah.

“Tu nyengkaum ngintu pengelantang, ngaga rumah ulih dibeli, nyeleti rumah repuk enggau ngatur program penau sereta vokasional ngagai raban penatai pemisi baruh RM3,000 (B40).

“Aku mega nerima manah inisiatif dipejalaika Gempung ukai dikuasa perintah (NGO) ti udah mantu raban seranta lalu perintah deka seruran nempa kaul manah begulai enggau NGO munaska penyeranta,” ku iya.

Nangkan nya Abang Johari madahka perintah endang beratka pekara sereta keran bejalaika pengawa ti nadai ngaul peyalah makai suap.

“Perintah Sarawak ba Langgur Pemansang Malaysia Lumpar Ke-11 (RMK11) udah ngelanggur mayuh bengkah program kelebih agi Projek Rayat enggau Projek Transformasyen Menua Pesisir.

“Di baruh projek tu, penyampau belanja udah diagih chukup besai lalu perintah bejalaika tanggungpengawa enggau meruan nitihka atur ti udah ditetap nentuka ulah makai suap nadai nyadi,” ku iya nandu.

Iya nyemetak madah opis menteri di baruh kuasa iya tetap nerima tanggungpengawa enggau integriti tinggi sereta nadai dibalut penyalah makai suap.