Op Penawar, 126 soldadu Rejimen 511 dianjung ke Sibu

KUCHING: Urung enam iku pegawai enggau 120 iku soldadu sereta volunteer Rejimen 511 Askar Wataniah udah diasuh nyaup pengawa nerit Atur Mindah Betagang (PKP) di Sibu.

Panglima 3 Briged, Brigedier Jeneral Datuk Azhar Ahmad madah, sida diasuh gawa dibaruh perintah atur Op Penawar 9 Briged.

“Sida dipelaba ba din (Sibu) pengelama dua minggu tauka lebih bepanggai ngagai penyadi Covid-19 ke majak niki ba Sibu sereta diperati udah ngerekai ke Song enggau Kapit,” ku iya ba aum penberita Rejimen 511 Askar Wataniah, Kem Ria, Kota Sentosa ditu kemari.

Nya alai, iya ngarapka nengah atur nya, deka ulih mantu raban 9 Briged ti enda chukup tubuh bejalaika Op Penawar.

“Sida tu dianjung nyaga lapan batang jalai raya ke diempang (SJR) ba Sibu nengah gerah ari Panglima 9 Briged.

“Penatain sida dikelaluka Panglima 9 Briged sereta diberi penerang pasal tanggung pengawa ke patut digaga ba Sibu udah tu,” ku iya.

Nangkan ke nya, Komander Rejimen 511 Askar Wataniah, Brigedier Jeneral Abang Mohamad Abang Marzuki madah, semua pegawai enggau kaban soldadu wataniah ke dipilih enggau bepeneleba dalam Op Penawar, laban sida nya kala gawa ba Kuching sekumbang atur PKP sebedau tu.

“Ungkup Op Penawar, raban soldadu bisi bejalaika Latihan Diasuh Gawa (LKUB) lalu tu dipejalai kenyau March taun nyin kemari nengah konsep sebaka deka dipejalai ba Sibu.

“Sida tu datai ari raban pegawai enggau soldadu ke dipilih, nyadi anang irau laban sida udah chukup latih sereta nemu pengawa ke patut digaga,” ku iya.

Kenu ku iya, Rejimen 511 Askar Wataniah diatu bisi urung 2400 iku kaban.

Tandu iya, ba Op Penawar kenyauMac taun nyin kemari, Rejimen 511 Askar Wataniah kala nganjung 250 iku orang gawa ba siti maya.

“Enti dikira ari penyampau sida ke udah gawa nya, urung 500 iku soldadu wataniah kala gawa dalam Op Penawar tu,” ku iya.

Berebak enggau nya, Abang Mohamad mega meransang mayuh agi volunteer soldadu datai nganjung diri awakka ulih dianjung nyaup pengawa nya.

Ku iya, pengawa ngambi kaban baru mega benung dibuka ngagai raban anak Sarawak ke bisi ati nyadi kaban soldadu wataniah.

“Sida tau ngelawa raban bekaul awak ngemujur atur pengawa ke patut.

“Atur ngambi kaban baru tu mega bisi digaga chara online lalu ulih dipeda ba laman internet https://bit.ly/3jdicVh,” ku iya.

Azhar (tengah) begulai enggau Abang Mohamad (dua kiba) sereta Sapit Komander Rejimen 511 Askar Wataniah Lt. Col. Mohd Nadzri Ismail (dua kanan) begambar kenang enggau bala pegawai enggau kaban soladu wataniah ke deka dianjung gawa ke Sibu. Gambar Ramidi Subari