KUCHING: Sitak Opar bisi pengulih besai nyadi tibang padi Sarawak laban ngembuan tanah urung 800 hektar ba Kampung Jangkar, Lundu.
Kaban Kunsil Nengeri (ADUN) Opar, Billy Sujang madahka tanah ti besai ba Kampung Jangkar, Lundu nya engkeman amat dikena bejalaika pengawa bumai.
“Pengudah nyadi pegari rayat Opar, aku meda sitak tu bisi pengulih ba pengawa betanam betupi kelebih agi ba pengawa nanam padi ungkup pengelikun pemakai ba Sarawak.
“Tu seraris enggau polisi sereta inisiatif Premier Sarawak, Datuk Patinggi Tan Sri Abang Johari Tun Openg ti deka nempa Sarawak nyadi pemansut berau pemadu besai ba menua tu,” ku iya.
Billy bejaku munyi nya lebuh bejuraika Jaku Pemungkal Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar rambau DUN Ke-19 ba Kompleks DUN Sarawak ditu, kemari.
Iya madah, dikena ngepunka pengawa nya tumu, agih belanja sepenyampau RM3 juta ba baruh Ejensi Pemansang Greater Kuching (GKCDA) udah diagih dalam taun tu.
ADUN Opar nya ngarap raban bekaul ulih ngemansangka sitak nya nyadi sebuah palan pemansut berau tauka ngasilka benih padi ba Sarawak.
“Aku ngarapka Opis Menteri Industri Pemakai, Komoditi enggau Pemansang Wilayah, Opis Betanam Betupi Sarawak sereta Opis Parit enggau Entali Ai (DID) ulih ngemansangka sitak tu,” ku iya.
