KUCHING: Operasyen serikat bilun ti diempu Sarawak deka ditemu pengudah randau, pansik enggau kerejasama ti meruan diatur.
Sapit Menteri Pengangkut, Datuk Hasbi Habibollah madahka diatu pekara nya agi dirandau entara Perintah Sarawak, Khazanah Nasional enggau Opis Menteri Pengangkut.
“Perintah Sarawak deka ngambi operasyen MASwing nyadi siti penerebai bilun ba baruh Servis Langit Menua Pesisir (RAS).
“Kitai nemu Sarawak ukai semina deka naka tu aja (penerebai bilun dalam menua aja), kitai deka penerabai bilun tu jauh mungkur palan bukai,” ku iya.
Hasbi bejaku munyi nya lebuh ditanya pemberita pengudah bejadi Operasyen Radar ba Kuching ba baruh projek KKFIR ditu, kemari.
Ku iya, servis RAS nya ila deka ditampung perintah taja pen Perintah Sarawak udah ngambi penerabai bilun tu ila.
Iya madah, nya nyengkaum beri subsidi RM209 juta setaun ngagai servis RAS nya.
Ba bulan Oktober tu tadi, Perintah Sarawak, Hornbill Skyways Sdn Bhd enggau Malaysia Aviation Group (MAG) udah nyain Sempekat Pemereti Ati (MoU) dikena ngambi saham MASwings Sdn Bhd.
Program nya diatur ba Palan Aum Borneo Kuching (BCCK) ti dikemataka Premier Sarawak, Datuk Patinggi Tan Sri Abang Johari Tun Openg sereta bala menteri bukai.
