BALI: Republik Singapore deka numbuhka Opis Konsulat Jeneral Republik Singapore ba Kuching, Sarawak.
Premier Sarawak, Datuk Patinggi Tan Sri Abang Johari Tun Openg madah, pengawa numbuhka opis nya ba Kuching udah dipesetuju lebuh Program Gempuru Bala Tuai Ninting Taun Malaysia-Singapore Ke-10 ba Singapore kemari.
Ku iya, pemisi opis nya mega deka nambahka pengerapit kaul begulai lalu terus nyungkak ekonomi entara Sarawak enggau Singapore kelebih agi dalam sektor dagang temuai enggau sektor bukai.
“Reti iya, kaul deka manah agi ari pemisi Opis Konsulat Jeneral Republik Singapore ti ditumbuh ba Kuching.
“Aku pen udah berandau enggau Menteri Pengangkut, Anthony Loke lebuh ba Singapore pasal perambu ngambi berundingka serikat penerebai kitai, MASwings ngatur penerebai ke Singapore,” ku iya.
Abang Johari bejaku munyi nya rambau aum pemberita pengudah ngatur Aum Bilateral begulai enggau Presiden Serakup Kuasa Hidro Antarabansa (IHA), Malcolm Turnbull serimbai Kongres Kuasa Hidro Dunya 2023 ba Bali Nusa Dua Convention Center ditu, tadi.
Iya madah baru, pengawa nya mega deka negapka agi industri dagang temuai Sarawak kelebih agi ngaul penatai bala pengusung ari Singapore nyengkaum temuai ti datai ba Singapore ke nengeri tu.
