KUCHING: Opis Menteri Pelajar Malaysia (KPM) merambu bejalaika polisi ti ngemeratka pengajar ari Sarawak ngambi ngajar ba nengeri sida empu.
Sapit Menteri Pelajar, Inovasyen enggau Pemansang Penau (MEITD), Datuk Dr Annuar Rapaee madah, nya sebengkah inisiatif dikena mutar isu suntuk pengajar.
Iya madah, nya mega dikena mutar isu pengajar ari nengeri bukai ti nulak ngajar ba Tanah Kenyalang tu.
“Nyangka pengajar ari luar Sarawak nulak peluang gawa ba nengeri tu ketegal nadai pengerindu ngajar ditu, kurang penyedar tauka napi sekeda penanggul.
“Inisiatif besai patut dipejalaika KPM lalu nya ukai ngena chara pejal.
“Entara inisiatif diperambu baka KPM patut bejalaika polisi ti ngemendarka semua pengajar Sarawak otomatik ngajar enggau nabur jasa ba nengeri diri empu.
“Tu entara polisi ti patut dipejalaika KPM dikena ngurang isu bekaul pelajar ba nengeri tu,” ku iya.
Dr Annuar mansutka jaku nya rambau Sesyen Dialog TVS: Polisi Pelajar Sarawak Seraris Pemansang Begulai enggau Sapit Menteri MEITD, Datuk Dr Annuar Rapaee ti dipandang nengah Facebook TVS malam kemari.
Ngelansa silik, ku iya, enti polisi nya dipejalai, iya pechaya mayuh agi pengajar Sarawak ti ngajar ba Semenanjung Malaysia nyikap diri gawa ba nengeri sida empu.
Ba lansa sebaka, bemacham inisiatif udah dipejalaika Perintah Sarawak dikena ngangkat kualiti pelajar nengeri nyengkaum negapka profesionalisma pengajar.
