Pekit Golf nyungkak dagang temuai Sarawak

KUCHING: Pekit Golf Tebuka Amatur Malaysia Ke-117 deka nyungkak pemansang ekonomi dagang temuai di Sarawak.

Presiden Gerempung Golf Malaysia Tan Sri Datuk Setia Mohd Anwar Mohd Nor madah pekit tu sebagi ari promosyen dikena ngelakuka industri dagang temuai sereta narit ati mensia ari menua bukai datai kitu.

“Pekit Golf Tebuka Amatur Malaysia Ke-117 tu ulih kena ngelakuka Taun Ngelawa Sarawak 2019 nyadi sebengkah chara nyungka ekonomi ba ditu.

“Tu siti peluang ti beguna mantaika pemanah perengka guna, mayuh pupu bansa enggau penyelai menua Sarawak laban digulu mayuh mensia ari menua luar,” ku iya.

Setia madah pekara nya pengudah penemuai meri basa ngagai Kepala Menteri Datuk Amar Abang Johari Tun Openg ba Opis Kepala Menteri ditu, kemari.

TROFI PEKIT…Tan Sri Datuk Setia Mohd Anwar Mohd Nor (tiga kanan) nyuaka trofi pekit ngagai Kepala Menteri Datuk Amar Abang Johari Tun Opengbeserimbai enggau Pekit Golf Tebuka Amatur Malaysia Ke-117 seraya dikemata Datuk Abdul Karim Rahman Hamzah (empat kanan) enggau bala bukai ba ditu kemari.

Kelimpah nyadi palan nemuai ngagai Sarawak, iya mega madah pekit tu mantu nembiak rebak baru ngemansangka penegap ati ba pengelandik diri empu.

“Kitai deka meda nembiak rebak baru ti rinduka main golf ngambi ransing enggau bedisiplin ngemansangka diri datai ba renggat entarabansa,” ku iya.

Nangkan nya, Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madah pekit tu udah narit 3,000 penyereta pekit.

“Lebuh kami muka penyereta minggu nyin kemari, dalam kandang seminggu bisi 1,000 penyereta ngerejister diri lalu 20 peratus ari sida iya penyereta menua luar.

“Tu bedau nyengkaum ruang bilik sida agi laban angka temuai ti dipelaba datai tu ila deka belipat pemayuh,” ku iya.

Pekit Golf Tebuka Amatur Malaysia Ke-117 deka diatur 18 nyentuk 23 Jun tu ila ti dipelanja penuh Perintah Nengeri Sarawak ti mega nyadi tuai rumah pekit.

Sama datai ba penemuai basa nya Sekretari Mendam Opis Menteri Dagang Temuai, Seni, Main Asal, Nembiak enggau Lumba Hii Chang Kee enggau Presiden Gerempung Golf Sarawak Hoan Kee Hock.