SRI AMAN: Sarawak benung beratika peluang engka ulih meri bantu pelajar tinggi pechuma ngagai rayat Sarawak ba taun 2025 tauka 2026.
Premier Sarawak, Datuk Patinggi Tan Sri Abang Johari Tun Openg madah, Opis Menteri Pelajar, Inovasyen enggau Pemansang Bakat (MEITD) diatu benung bejalaika tungkap ngelala ulih ke enda pelajar tinggi pechuma tu disedia.
“Perambu kami nya ngasuh palan pelajar tinggi ke diempu perintah nengeri diberi pechuma ngagai rayat Sarawak ti ulih nampung pelajar.
“Nya alai, aku udah minta Menteri MEITD, Datuk Roland Sagah Wee Inn enggau Sapit Menteri iya, Datuk Dr Annuar Rapaee bejalaika tungkap sekali ke kitai ulih meri pelajar tinggi tu pechuma tauka enda.
“Nitihka asil tungkap sida, insya-Allah, aku ngasaika di baruh Langgur Pemansang Malaysia Lumpar Ke-13 (RMK-13) ba taun 2025 tauka 2026, kitai ulih nyendiaka pelajar tinggi pechuma ngagai rayat Sarawak,” ku iya.
Abang Johari bejaku munyi nya rambau program nutup Pengerami Benak Sri Aman Edisyen Ke-20 2023 ba Tebing Waterfront Sri Aman ditu, tadi.
Iya madah, sida keran mai inisiatif pelajar tinggi pechuma nya datai ba taun 2026 laban pechaya ekonomi nengeri deka tegap maya nya ila.
