Pemadas kerejasama PVTKR enggau ATM dipuji

KUCHING: Pemadas kerejasama entara kaban Gerempung Veteran Soldadu Kor Renjer (PVTKR) enggau Raban Soldadu Malaysia (ATM) 3 Briged ngelama tu bekaul enggau pengawa kerejasama ngintu pengelantang raban veteran nerima puji sereta basa ari Panglima 3 Briged Infantri Malaysia, Briged Jeneral Dato Azhar Ahmad.

Nitih penerang, kena Hari Satu tu tadi (23 Nov) kaban Exco PVTKR bisi datai ngatur penemuai basa ngagai Panglima 3 Briged di Kem Penrissen ditu seraya nerangka pasal aktiviti enggau pengawa ke udah digaga enggau benung diperambu gerempung.

Ba penerang nya mega madah, entara pengawa kerejasama PVTKR enggau Raban Soldadu Malaysia (ATM) 3 Briged ke balat dipuji Dato Azhar iya nya semua pengawa kerejasama ke udah dipejalaika rambau ngesah penusah rabat enggau ngaduka tusun pengawa maya nguburka pemati bala veteran.

Berebak enggau Presiden PVTKR, Lt Kol (B) Mohd Melintang Abdullah madah arapka kerejasama manah entara PVTKR enggau ATM tu dipajak awakka sebarang pengawa ke deka diatur dudi hari lanchar dipejalai.

“Terima kasih besai ngagai semua soldadu ke seruran meri kerejasama rambau ngintu pemati bala veteran ngelama tu.

“Pia mega semua atur pengawa dikereja kami mujur magang berekat ari sukung bala pemesai atas nyengkaum ari Dato Azhar empu, ” ku iya madah ngagai Suara Sarawak, kemari.

Ungkup penemu mega, PVTKR diatu bekerejasama enggau piak Unimas benung chakah ngumpul enggau nyidi cherita bala soldadu lebih agi raban Sarawak Renjer awakka ulih ditulis sereta dichelak dalam bup sereta disadang tembu ba taun baru (2021) .

Sama bisi enggau ba pengawa penemu basa tu iya nya Mejar (B) Haji Sharkawi Dawi enggau Pegawai Waran II (B) Klement Nyapong.