KUCHING: Pemansang penau beguna amat nyadi sebagi ari agenda ba pemansang modal mensia dikena nyungkak juluk pemansang menua.

Menteri Pelajar, Inovasyen enggau Pemansang Penau, Datuk Seri Roland Sagah Wee Inn madah, opis sida udah sereta benung merambu bemacham program enggau aktiviti nyengkaum bengkel sinergistik.

Ku iya, pengawa nya mungkur industri, palan pelajar tinggi menua sereta raban bekaul dikena nangkup guna pengereja pengawa bepenau kemaya hari tu.

“Juluk besai endang dikena ngerapit takah entara peminta enggau bekal pengereja pengawa bepenau ba industri.

“Penyulut ba pengawa ngurang takah bekal-peminta udah tentu nyendia mayuh agi peluang gawa ngagai rayat Sarawak,” ku iya.

Sagah mansutka jaku nya lebuh bejaku ba Eksibisyen Karier enggau Latih Sarawak (SCaT Fair) 2023, sehari tu.

Terang iya, beguna amat nembiak tauka sida ti ngiga pengawa ba menua tu dikelaku ari sukut pengelandik, penemu sereta penau.

“Enti sida disikap ngena KSA ti diguna industri, udah tentu sida ulih ngereja pengawa ti diberi enggau manah sereta ngasi agi.

“Pengawa dikereja nya udah tentu ulih meri empas besai ngagai pengidup sida enggau penggaji ti ulih nyungkak pemansang ekonomi Sarawak,” ku iya.