SARATOK: Sapit Menteri Pengeluar Kuasa enggau Pengeraja Asal, Ali Biju, berasai sinu beratika sebana rayat ti suah diri merinsa nengah jalai bedau betar ditu.

Nya alai, iya mujur ngelimpangka awak diri datai ngabas lalu mendingka sebana rayat lebih agi peranak Rumah Majang, Ukir di Awik ditu.

Sebedau tu ku Ali, iya suah ninga penanggul ditapi rayat ba menua Ukir tu tang apin bisi awak ulih ngelimpangka diri ngabas enggau beratika penanggul nya.

“Mayuh udah sebana didinga ari tuai rumah enggau nembiak redak iya ngagai aku pasal jalai ngelawa rumah sida.

“Nya kebuah aku ngena awak sekalitu ngenataika diri ditu, nujah jalai tu empu ngambi bela ulih ngasai penusah enggau pemerinsa diasaika rayat ngelama tu,” ku iya.

Ali ti mega Kaban Parlimen Saratok mansutka jaku nya rambau Progam Ngetu Merarau Begulai Enggau Rayat Rumah Majang ditu, tengahari tadi.

Iya madah, tu keterubah niki ngagai rumah panjai nya sekumbang dipilih nyadi pengari rayat dia lalu penemuai nya endang bisi tuju ke besai.

“Aku udah meda lalu ulih ngasaika penusah diasaika kita ke diau ba menua tu, mar deka mindah laban nadai sambung jalai ke meruan.

“Ari nya, aku deka ngemendarka agih belanja ungkup projek nyeleti jalai tu lalu projek tu deka dirumban.

“Piak Opis Kereja Raya (JKR) mega udah nyukat lalu penyampau belanja dikena deka dipadah baru nyengkaum pengawa meri tinda.

“Tu projek dikemerat enggau dirumban aku ungkup bajet taun tu,” ku Ali madah nyemetak.