KUCHING: Tiang pemanchar Celcom 4G ke guna peranak ba Kampung Mambong enggau genturung besemak urung 2 kilometer radius udah diseruri.

Sapit Menteri Bekebun Dandang Besai enggau Komoditi Malaysia Datuk Willie Mongin madahka arus telekomunikasyen tu diseruri ngambika bala nembiak sekula nadai penanggul ba pengawa Ngajar enggau Belajar ari Rumah (PdPR).

“Kelimpah ari nya, peranak menua nya mega nyamai agi berandau enggau orang ti jauh.

“Genturung pendiau bukai mega bisi napi penanggul arus telekomunikasyen ti enda manah, aku enggau naka ulih mutarka penanggul nya,” ku iya dalam siti penerang media, ensana.

Willie mega meri terima kasih ngagai Menteri Komunikasyen enggau Multimedia Malaysia Datuk Saifuddin Abdullah ti mayuh mantu ngulihka perengkaguna tu.

Nangkan nya, ngelansa pasal lampu ba jalai Puncak Borneo lebuh ditanya siku penguna media rama, iya madahka jalai nya udah dipasang lampu solar enggau lampu karan ba jalai besai ke beungkus RM200,000.

“Laluh RM2.8 juta deka dipejalaika taun tu.

“Agih belanja tu dikemendarka Opis Menteri Pengawa Berumah enggau Kaunsil Kandang Menua Malaysia lalu projek nya deka dipejalaika Kaunsil Kandang Menua Padawan (MPP),” ku iya.