SARATOK: Isu bekal ai ke ditapi peranak Rumah Ipa, Krango, Krian tebantai pengudah rumah panjai nya enda disengkaum ba rintai penerima bekal ai beresi ari Opis Bekal Ai Menua Pesisir (JBALB).

Kaban Kunsil Nengeri (ADUN) Krian, Friday Belik, madahka pekara nya dipadah ngagai iya lebuh ngabas rumah panjai nya laban deka berati sereta mending penanggul ditapi peranak dia.

Ku iya, penanggul nya majak nyadi lebih musin kemarau empai lama laban bekal ai bukti ti diguna peranak majak langkang.

Friday madahka iya berasai asa pengudah dipadah bekaul Rumah Ipa enda dipasuk ba rintai rumah panjai ti patut nerima bekal ai beresi ari JBALB.

“Peranak madah ngagai aku, Rumah Ipa enda disengkaum ba rintai rumah panjai ke nerima bekal ai beresi ari JBALB,” ku iya.

Berindik ari nya, Friday ngansak JBALB berati ke pekara nya lalu ngiga chara mutar penanggul enggau lengkas bekaul penanggul bekal ai ba rumah panjai nya.

Ku iya, akses bekal ai beresi nya begunа endar ba komuniti lalu chara mutarka penanggul timpuh panjai meseti diperati nentuka peranak enda kelalu bepanggai ba pemansut ai bukti ti majak langkang maya kemarau.

Pejalai ngabas nya bela digulu pengari JBALB Bagi Menua Betong lalu meri peluang ngagai peranak ngenataika sebana sida ngagai ejensi nya.

Kelimpah ari isu bekal ai, peranak mega mantaika sekeda peminta bukai ke udah lama ditapi sida ngambi diperati raban bekaul.

Sama datai, Hatta Adenan ti ngari ke Pegawai Pelilih Saratok, pengari ari JBALB Bagi Menua Betong, Tuai Rumah Mulok, sereta peranak Rumah Ipa. — SF