MIRI: Perintah Besai udah ngemendar agih belanja RM1.2 juta dikena bejalaika projek tumu jalai keliling GK Pujut Tiga ungkup pemaik mensia mayuh ti betengahka jalai nya.
Pekara nya dibantai Menteri Kereja Raya, Datuk Seri Alexander Nanta Linggi rambau matau perambu enggau pejalai projek infrastruktur Jalai Perintah Besai ba Miri kemari.
Iya madah, projek nya mungkur jalai keliling sekali enggau simpang trafik ti bisi tanda sereta nangkir jalai empat arung ti endang udah bisi ngagai enam arung dua jalai ti dipelaba beungkus RM67 juta.
“Projek tu nyengkaum operasyen lampu trafik pintar dikena ngelanchar jalai trafik ba sitak tu,” ku iya.
Iya nyemetak madah pemesai guna pengawa nyeleti jalai keliling GK Pujut nya dikena nambah pengelanchar arus trafik ba Jalai Pujut-Kuala Baram, Pujut-Miri enggau Piasau.
Ketetiga jalai nya, ku iya, semampai sekut kelebih agi lebuh jam orang nurun enggau pulai gawa berebak ari langkar tengkebang jalai enggau gaya jalai keliling nya.
“Perintah Besai nengah opis menteri aku udah meri agih belanja RM400,000 dikena nyeleti sekeda jalai ti dikenuku suah nyadi penusah aksiden nengah pengawa ngelala sekeda palan ti suah aksiden ba Miri,” ku iya.
Sama datai, Sapit Menteri Dagang Temuai, Industri Kreatif enggau Seni Pemerindang, Datuk Sebastian Ting Chew Yew, Kaban Parlimen Miri, Chiew Choon Man sereta Datuk Bandar Miri, Adam Yii.
