Pencha main asal Iban ti jarang dipeda

“Pencha nyau deka baka ngajat enggau kuntau lalu dimain ngena pedang.”

KUCHING: Gerempung Iban Kuntau (Sikar) berengkah ngatur pengawa ngangkatka main asal enggau muka Kelas Pencha.

Kelas Pencha nya di ajar Tuai Rumah Adi Jala, siku orang ti nemu main asal sereta bisi peneleba ngajar orang mayuh macam main asal maya iya gawa nyadi soldadu kelia.

Ketuai Sikar, Gerard Joseph madah, pencha, siti ari main asal kitai Iban ti nyau jarang dibantai ke maya hari diatu.

“Pencha nyau deka baka ngajat enggau kuntau lalu dimain ngena pedang,” pia ku iya madah, kemari.

Gerard ngarap sida ke belajar pencha bebendar agi nambah penemu nyentuk besaup ngerembaika pencha.

Kelimpah ari ti ngatur Kelas Pencha, Sikar mega deka ngatur kelas kuntau enggau simposium kuntau jemah ila.

Penyanding penemu Sikar, Mabong enggau Churchill Edward arapka Sikar ulih mai kuntau Iban ngagai renggat ti tinggi agi iya nyentuk nyadika kuntau nya siti ari pekit main asal ti ulih dibantai baka lumba enggau main ba renggat sekula, negeri tauka ba tikas antarabansa.

TANKA PENCHA… TR Adi (duduk, tengah) sereta bala bukai begambar enggau nembiak belajar pencha.

 

BAKA TU…TR Adi ngatur bungai pencha ditunda bala nembiak iya.