SRI AMAN: Urung dua minggu udah melah pinang, Kort Majistret ditu ngeletak ukum mata duit RM10,000 ngagai siku pengantin lelaki enggau pengapit iya ketegal nyadi keledai akaun sindiket nipu nengah tali arus.
Dua iku bakih nya nerima duit sepenyampau RM12,750 ba akaun seduai empu ba bulan March taun tu tadi.
Daniel Hamizi (pengapit), 22, enggau Mohd Sufian (pengantin), 26, bela ngaku salah ngagai siti dawa ti dibacha kediri ba mua Akim Intan Nurul Farena Zainal Abidin.
Bepelasarka dawa, Daniel didawa nerima transaksyen duit lebih RM8,800 ba akaun bank iya empu ari siku lelaki ti beumur 31 taun.
Mohd Sufian mega didawa nerima transaksyen duit lebih RM3,950 ba akaun bank iya empu ari lelaki sebaka.
Seduai nerima transaksyen nya di Jalai Kejatau kena 3 March 2025.
Kes nya dipansik nengah Seksyen 424C(1) Kanun Keseksaan lalu enti dikenuku salah ulih dijil enda kurang ari tiga taun enggau enda ngelui ari 10 taun tauka diukum mata duit enda kurang ari RM10,000 enggau enda ngelui ari RM150,000 tauka kededua sekali.
Kort ngenuku seduai dijil 10 bulan nyema puntan mayar ukum mata duit nya.
