KUCHING: Premier Sarawak, Datuk Patinggi Tan Sri Abang Johari Tun Openg meri ulu lungga Sapit Premier Sarawak, Datuk Amar Dr. Sim Kui Hian deka ngetanka penuduk Batu Kawah ba Pengawa Bepilih Besai (PRU) Sarawak Ke-13. Taja pia, Chairman Gempung Parti Sarawak (GPS) nya madah, pemutus rasmi chalun semina digaga datai ba hari nganjung nama kena 28 November.
“Ya, aku meri ulu lungga dulu, rintai kepenudi chalun kitai semina dituku hari ngantung nama,” ku iya lebuh dirandau pengudah ngelancharka Projak Ngaga Jalai Batu Kawa ke Jalai Stephen Yong ditu, kemari.
Dulu ari nya lebuh bejaku ba mua mayuh, Abang Johari terang ngarapka Dr. Sim agi ngarika Batu Kawah dikena nentuka pemansang menua nya.
Iya mega minta bala pengundi Sitak Kunsil Nengeri (DUN) nya nyukung penyandang lalu nulak lambang rukit ti nunjukka Parti Tindakan Demokratik (DAP). “Aku Chairman GPS lalu aku udah berandau. Pengari rayat Batu Kawah meseti Dr. Sim.
“Sarawak udah berubah, tang anang nyilih Dr Sim ngambi DUN tu ulih ngasaika buah pemansang ti deka digaga kitai,” ku iya.
Abang Johari mega madahka engka penyandang Kota Sentosa, Wilfred Yap; penyandang Batu Kitang, Datuk Lo Khere Chiang enggau penyandang Meradong, Datuk Ding Kuong Hiing bela agi bediri minta pilih maya PRU Sarawak Ke-13
. Seraya lebuh ditanya sekali ke mayuh agi nama chalun deka dibantai maya Konvensyen Parti Pesaka Bumiputera Bersatu (PBB) ila, iya madahka pekara nya bepanggai ba utai ti nyadi. “Anti mih.
Nama kebuah berumban baban?” ku iya lalu madahka rintai chalun GPS deka diputus sebedau hari ngantung nama.
Abang Johari mega ngena jaku silup perau dikena mandangka gaya utai ke nyadi semak PRU Sarawak Ke-13.
“Tawak udah diterentang, perau udah tembu diban enggau bala ti bekayuh pen udah besikap.
Maya kitai nurun ke perau, meseti ka bejimat. “Enti enda nemu bejaga, kitai tau karam
