KUCHING: Perintah Sarawak sedia meri peluang dagang dagin jagu dikena ngemayuhka agi orang ngaul diri dalam aktiviti munuh beraban tauka miah (culling) jagu ba nengeri tu.
Sapit Menteri Pemansang Mengeri Enggau Pengeraja Asal Datuk Len Talif Salleh madah, nya bekau ari jagu ke majak nambah sereta majak ngirauka ati.
Ku iya, taja pan lisin miah udah dikeluarka, tang pengawa nya agi bedau entu chakah dipejalai ketegal sekeda pemali kelebih agi ngaul komuniti Melayu enggau Dayak.
“Nya kebuah perintah deka meransang mayuh agi orang ngambi bagi (miah jagu) ba pengawa dagang nya.
“Nya agi begunaka permit, anang nangkap sengapa laban kitai agi nyaga pengawa nya ungkup dagang kulit enggau dagin jagu,” ku iya.
Len bejaku munyi nya rambau aum pemberita pengudah nyaut tanya Kaban Kunsil Nengeri (ADUN) Balingian Abdul Yakub Arbi ba Aum Kedua Bagi Penggal Kedua DUN Sarawak ti Ke-19, ditu tadi.
