KUCHING: Sarawak chakah bejalaika pengawa nyikap diri nyadi tuai rumah ngatur Para Lumba Malaysia (SUKMA) XXI Sarawak 2024 ti deka diatur kena 22 nyentuk 28 September tu.
Tuai Pegawai Eksekutif (CEO) Para SUKMA XXI Sarawak 2024, Datuk Hii Chang Kee madah, naka diatu, pengawa nyikap ari sukut nyendia palan lumba enggau logistik benung ranchak dipejalai.
Iya madah, bisi 23 komiti nyengkaum Sekretariat Para SUKMA mega mujur ditumbuh dikena ngelancharka agi pengawa nyikap nya.
“Empai lama, kitai mujur numbuhka tim ngambat ba padang bidung lalu penatai enggau pemulai bala kontinjen deka diatur meruan ngambi lanchar,” ku iya.
Chang Kee mansutka jaku nya rambau nyadi tuai Aum Begulai enggau CDM Serimbai Pengawa Nyikap Para SUKMA XXI Sarawak 2024 ba Raia Hotel & Convention Centre ditu, kemari.
Iya ti mega Sapit Sekretari Perintah Sarawak (Operasyen) bela ngemerat pengawa klasifikasyen atlit diatur enggau manah ngambi lumba besai nya lanchar.
Aum nya digulu 15 tuai kontinjen Para SUKMA tauka pengari ari semua kontinjen ti ngambi bagi ba lumba besai nya.
Pengudah aum nya, iya begulai enggau diligit CDM ngabas pengawa ngerejister atlit enggau pegawai tim SUKMA XXI ba Hotel Grand Margherita.
Iya madah, pengawa ngabas nya dikena meri peneleba ngagai CDM Para SUKMA bekaul pengawa ngerejister atlit enggau pegawai sida.
