SRI AMAN: Pengawa ngintu Hari Malaysia ukai semina pengerami aja, tang nyadi pelasar ke beguna endar dikena ngembing rebak dudi meretika pejalai enam puluh taun Malaysia nuju pemansang enggau pengelantang.
Menteri Pelajar, Inovasyen enggau Pemansang Bakat Sarawak, Datuk Seri Roland Sagah Wee Inn, madah pengerami ke diintu ninting taun tu meri peluang ngagai rayat Sarawak ngingatka sejarah hari bulan 16 September 1963 ke chukup beguna dalam sejarah menua tu.
Hari bulan tu, ku iya, patut seruran diterenak ba genap iku rayat.
Iya mega nerangka rambai pengerami taun tu ‘Malaysia Madani Jiwa Merdeka’ mandangka aspirasyen penegap pengelantang rayat datai ari pupu bansa enggau jalai pengarap di Malaysia.
“Reti rambai jaku tu nempa rayat ngembuan pengelurus sereta semangat nasional ti tinggi, kelimpah nyapai pengelantang begulai.
“’Jiwa Merdeka’ ukai semina mai reti pengelepas, tang pengeransing dikena negapka pelajar, ekonomi enggau penyerakup ngambi kitai ulih mutar bemacham pemar ti deka datai,” ku Sagah ba jaku iya beserimbai enggau Pengerami Ngintu Hari Malaysia Renggat Sarawak 2024 di Stadium Tetutup Kompleks Lumba Sri Aman, Hari Satu.
Berebak enggau nya, iya mega madah ke pemesai guna penemu senentang sejarah penumbuh Malaysia ngambi nembiak rebak dudi nemu literasyen sejarah.
Ku iya, bansa ti mujur iya nya rebak ke mereti penatai sida iya, sereta meretika ulah menyana ti tegap sereta mantaika identiti anak Malaysia ti penuh enggau semangat talukka menua.
Pia mega, iya meri basa ngagai bala tuai Sarawak enggau Sabah siba ke udah bejalaika tanggungpengawa beguna ba pengawa numbuh Malaysia.
Sagah meransang bala pemesai ke udah negika Sarawak enggau Malaysia diaku penuh nyengkaum sida ti bisi kaul ngiri penemu mensia mayuh maya numbuhka Malaysia.
Pengerami Hari Malaysia Renggat Sarawak 2024 digulu bemacham serak komuniti, ke nerenakka agi semangat penyerakup enggau penaluk ngagai rayat Sarawak.
