SRI AMAN: Pengerami Mantar Gawai Dayak 2023 Gerempung Bansa Dayak Sarawak (SDNU) enggau Serakup Indu Dayak Sarawak (SIDS) Renggat Bagi Menua Sri Aman deka diatur kena 26 Mei tu.
Chairman SDNU Pampang Sri Aman Denis Gasan madah, Sapit Menteri Pelajar, Inovasyen enggau Pemansang Bakat II ti mega Adun Simanggang Datuk Francis Harden Hollis deka nyadi temuai ti dipebasa bejadi program nya ila.
Pekara tu dikenuku rambau penemuai basa raban komiti pengatur program ngagai Harden di Bilik Aum Kaunsil Pemansang Sri Aman (Sada) kena 13 April tu tadi.
Bejaku pasal pengerami nya, Harden meri terima kasih laban udah dikangau nyadi temuai ti dipebasa bejadika program kelai bansa Iban tu.
“Aku temegah meda inisiatif sida ngemujurka Pengerami Mantar Gawai Dayak 2023 ti deka datai.
“Aku andalka raban komiti seruran bekerejasama laban nya kunchi ngatur sebengkah program seraya ngelalau raban SDNU enggau SIDS terus negapka kaul tu ungkup bansa Dayak di Bagi Menua Sri Aman,” ku iya.
