MATU: Pengawa ngatur Pengerami Matu dipeda ngembuan penyelai kediri empu ba pengawa mantai pengulih enggau penau komuniti kelebih agi anak biak di sitak nya.
Kaban Kunsil Nengeri (ADUN) Jemoreng, Datuk Dr Juanda Jaya madah, taja pen diatur ba skala mit tang pengerami nya nerima timbal manah enggau richah.
Iya madah, pengawa bemacham raban baka ejensi perintah, tuai komuniti enggau orang kediri ti ngaul pengerami tu balat mantu ba pengelanchar enggau penyulut pengerami tu.
“Kelimpah nyadi pelasar beguna dikena mantai penyelai pelilih Matu ngagai dunya luar, kitai mega deka mantai penau lokal enda ngira pegawai perintah, tuai komuniti, anak biak enggau sapa-sapa aja.
“Kitai deka sida ngasaika Pengerami Matu tu siti pengerami kitai begulai,” ku iya.
Dr Juanda mansutka jaku nya rambau bejadi Program Nangguh Pengerami Matu ditu, kemari.
Pengerami ti bepelasarka sulu jaku ‘Matu Je’ulo’ nya bela mantaika pengawa mandang ari semilan ejensi perintah enggau enam bansal bejual komuniti.
