KUCHING: Pengerami Saratok ti nyadi sebengkah pengerami ninting taun ba pelilih nya ngembuan pengulih besai dirintai dalam kalinda dagang temuai Sarawak, ku ADUN Kalaka, Mohamad Duri.
Iya madah, ninting taun bemacham program bisi diatur beserimbai Pengerami Saratok ti ulih matak temuai ari dalam enggau luar Sarawak kelimpah nyadi sebengkah produk dagang temuai ba menua tu.
Ukai nya aja, ku iya, Pengerami Saratok nya endang timpuh ti besai reti ngagai rayat Borneo laban musin ngetau abis entara ujung bulan Mei enggau pun bulan June.
“Siti pekara dikemerat aku ba Pengerami Saratok tu iya nya pengerami tu mai reti besai ngagai raban orang bumai kelai beterima kasih ngagai asil padi ti manah.
“Nya alai, tu meh maya pengerami tu patut diangkat ngagai tikas ti besai agi dikena matak mayuh agi temuai datai ngagai Sarawak,” ku iya.
Mohamad mansutka jaku nya rambau aum pemberita bekaul pengawa ngatur Pengerami Saratok ba Begunan Baitulmakmur II ditu, kemari.
Ku iya, pengerami ninting taun nya deka berengkah diatur kena 1 nyentuk 30 Julai ba Pasar Saratok lalu bisi 200 bansal deka dibuka nyengkaum pengawa nyual kraf jari, pemakai enggau ai irup.
Iya madah, Saratok bepalan semak enggau sekeda pelilih baka Pelilih Sarikei enggau pasar mit baka Selalang sereta mengeri Sibu lalu pengerami nya deka matak mayuh temuai ngelingi nya.
Iya ti nyadi penaung Komiti Pengerami Saratok 2023 madah, aktiviti besai rambau pengerami nya endang Regata Kalaka 2023 sebengkah lumba perau dikena ngerebut gelar Raja Sungai 2023.
Terang iya, Raja Sungai deka mai pulai perais mata duit RM15,000 sereta trofi.
