Kemari Opis Menteri Dagang Dalam Menua enggau Pekara Penguna (KPDNHEP) ngemendarka pedagang kedai renchit natak penguna meli minyak makai semina 3 piket minyak 1kg ungkup sekali meli berengkah 19 Januari tu tadi. Pekara nya udah diaku Menteri iya, Datuk Seri Alexander Nanta Linggi.
Suara Sarawak bisi minta timbal sekeda bala orang dagang ti suah meli minyak makai ba kedai sida.

“Aku bedagang kuie dilah sigi endang ngena minyak makai ninting hari. Kebendar aku enda berapa setuju minyak makai tu dijual semina tiga pikit aja laban enda chukup. Kami nyau meli minyak butul ti lebih mar dikena nambah minyak makai kena bedagang. Ari sukut ungkus belanja tu amat tinggi.”

“Aku bisi muka dagang kedai makai di Sebangan. Aku suah meli minyak makai nya sekutak ngulihka enda suah meli ke pasar. Enti meli tiga pikit aja kira rugi meh ba aku. Taja pia, kami mega bisi meli minyak makai ngena butul kena nyumai lauk ungkup dijual ba kedai makai.”

“Aku bedagang nyual kuih ba tisi jalai. Nyau deka semua kuih ti dijual aku ngena minyak makai. Aku kurang setuju minyak makai dijual semina tiga pikit aja laban ninting hari lebuh bejual aku begunaka urung enam pikit lebih minyak makai dikena nguring kuih.”