KUCHING: Pengawa meli tikit bas ngena kiosk ba Terminal Bas Sentral Kuching siti singkang ke mua dikena nyeliahka penyekut ba kaunter bebeli tikit.
Sapit Menteri Perengka Pengangkut Datuk Hasbi Habibollah madahka pengawa nyendiaka kiosk elektronik nya ulih mantu ngelancharka proses meli tikit enggau nukar tikit ngambi mensia mayuh enda ibuh berintai panjai ba kaunter.
“Aku berasai tepantup ati meda inisiatif tu laban orang enda ibuh bebaris panjai meli tikit.
“Tabi puji ngagai semua laban mujur mutarka penanggul orang bebaris panjai maya proses meli tikit,” ku iya.
Hasbi bejaku munyi nya lebuh aum pemberita pengudah ngulu Program Advokasyen Pengelikun Jalai Alun serimbai Musim Pengerami Hari Krismas 2024 di Terminal Bas Kuching Sentral ditu, malam kemari.
Berebak enggau nya, Menijar Tikit Kuching Sentral Tracy Likah lebuh ditanya madahka pengawa meli tikit ngena kiosk nya semina ulih dikena ungkup sekeda servis bas aja ungkup diatu.
“Mesin kiosk tu agi baru dikena lalu semina mimit aja operasyen bas ti ngaul diri baka Bas Asia, Eva, Freesia, Kapit Ekspres, MTC enggau SJS.
“Perambu kami endang amat deka ngaul semua operasyen bas ditu ngambika ulih bejalaika proses bejual beli tikit ngena kiosk tang pengawa nya deka dipejalaika berenggat,” ku iya.
