SPAOH: Penyerakup ti tegap ba peranak rumah panjai di Sarawak terus nyadi pugu besai ngagai pengelantang enggau pengelikun komuniti menua pesisir di nengeri tu.
Sapit Premier Sarawak, Datuk Amar Douglas Uggah Embas madah, semangat begulai enggau ulah bebasa ke pangan diri entara komuniti pupu bansa, pengarap enggau penatai nyadi kunchi penegap sosial enggau penyulut pemansang komuniti.
Iya madah, rayat Sarawak chukup betuah laban ulih idup begempung enda ngira raban bansa enggau pengarap.
“Tu meri pemaik ngagai perintah merambu enggau bejalaika pemansang betampung ke pemaik semua.
“Pengelantang ti diasai ke komuniti Sarawak sehari tu bebida enggau situasyen di sekeda menua bukai ti suah charut enggau bepechah.
“Nya alai, penyerakup ti dikembuan kitai tu patut ditan enggau ditegap,” ku iya nyemetak.
Uggah bejaku munyi nya rambau Program Merarau Mantar Krismas Kunsil Nengeri (DUN) Bukit Saban 2025 ti diatur Gerempung Tuai Rumah (GTR) Ulu Layar di Balai Mayuhguna Spaoh ditu, kemari.
Iya ti mega Kaban Kunsil Nengeri (ADUN) Bukit Saban madah, pengawa ngabas rayat ke rumah panjai enggau genturung komuniti mai perintah mereti guna rayat ti amat.
Nya, ku iya, beguna amat dikena nentu genap bantu ti diberi ulih diberi enggau sebela, ngasi sereta datai ba raban diselinting.
“Taja pen bebida penemu enggau budaya tang semangat penyerakup patut ditan dikena nyamin pengelantang, penegap enggau pengelikun nengeri.
”Dikena napi pemar dunya kemaya hari ti napi bemacham isu pengelikun, pengelantang ti diasai ke rayat Sarawak nyadi siti pengelebih besai ti patut ditan begulai,” ku iya.
Peranak rumah panjai bela dilalau terus regas ngesan pangku pengawa nyaga pengelikun enggau pengelantang komuniti sida empu ke pengelantang rebak dudi. – TVS
