KUCHING: Pengawa mantaika perambu netapka baru penuduk Kunsil Nengeri (DUN) Sarawak dipelaba ulih dibai ngagai Parlimen taun baru, bepanggai ba atur enggau prosedur ti benung dipejalai Komiti Pengawa Bepilih Besai (SPR).

Sapit Menteri Besai, Datuk Amar Fadillah Yusof madah, nitih ke penerang ari SPR, pengawanya agi ba renggat tumu mungkur ungkup tuju dibantai ngagai mensia mayuh sebedau sebarang pemutus dikenuku.

“Pengudah pengawa mandang nya dipejalai, mensia mayuh deka diberi awak ngenataika bantah tauka timbal nitih ke prosedur ti udah ditetap.

“Pengawa enggau prosedur aja nyangka enda nitih ke timpuh ti udah ditetapka… nya alai engka udah nya baru dipelaba ulih dibai (ke Parlimen),” ku iya.

Fadillah bejaku munyi nya ngagai pemberita pengudah pengudah bejadi Program Nyuaka Bantu Insentif Nembiak Nyulut RISE ba SMK Sains Kuching Utara, ditu kemari.

Ngelansa pasal timpuh mantaika pekara nya, Fadillah madah ke nya bepanggai ba SPR ti nyadi siti raban bibas ngatur pengawa ngaga baru adan sitak pengawa bepilih.

“Nya ba baruh kuasa SPR. Kami enda masuk champur ba pekara sida,” ku iya.

Iya mega nyemetak madah ke SPR bisi prosedur kediri empu nyengkaum begunaka pansik demografi enggau atur bekaul sebedau sebarang perambu dipejurai.

Ba bulan Julai taun siti nyin kemari, DUN Sarawak udah ngemendar rang undang-undang nambah penyampau penuduk ari 82 ngagai 99 penuduk.

DUN Sarawak diatu bisi 82 penuduk bekau ari proses ngaga adan baru kepenudi ti dipejalai ba taun 2015, iya nya nambah ari 71 ngagai 82 penuduk.

Taja pia, pengawa bejalaika tambah penuduk tu bedau ulih dikena laban nya bepanggai ba atur ngaga baru adan menua ari SPR nyengkaum pengawa nerang ngagai mensia mayuh, mansik bantah enggau mansik sitak ti patut dibagi.

Pengudah pengawa nya tembu, perambu nya enda tau enda dibantai ba renggat Parlimen ngambi dikemendar sebedau digazet sereta dipejalai enggau rasmi ba pengawa bepilih ti deka datai.