SIBU: Perintah Sarawak diperansang merambu pelin ekonomi dikena nyungkak pemansang ekonomi ba Sibu enggau sitak ngelingi nya.
Kaban Parlimen Sibu, Oscar Ling Chai Yew ba sebengkah penerang madah, pekara nya endang patut laban Sibu napi penambah penyampau peranak ti datai ari sitak menua pesisir ngagai mengeri nya.
“Raban tu ngarap diri bulih pengawa puang ti manah agi enggau gaji ti besai agi ba Sibu tang suah puntan laban Sibu nadai ngembuan mayuh pengawa puang.
“Mayuh peranak menua pesisir mindah ngagai mengeri ketegal ngarapka diri bulih pengawa puang ti manah agi sereta nyendia gaji ti besai agi,” ku iya nyemetak.
Ling pechaya Sibu patut matak mayuh agi raban nembiak ngentapka diri ba mengeri ngambi peranak ti datai ari menua pesisir ngagai mengeri Sibu kitu bulih pengawa puang ti manah agi.
“Perintah Sarawak meseti ngembuan perambu ekonomi ti nyengala ungkup Sibu sekali ke nya palan pelajar, palan data tauka pengawa eko dagang temuai ti ulih matak bala pemeranak puku ungkup pengawa numbuh kolej, pusat data tauka hotel sereta dagang temuai ti bukai,” ku iya.
Iya ngarap Sibu enda dikelaung Perintah Sarawak lalu sitak wilayah tengah mega ulih nyadi zon ekonomi besai ba Sarawak ngambi genap wilayah ulih diberi pemansut enggau pemansang ti sebela.
