Peranak Kpg Merakai udah tu nadai agi ngena ai bukit

SERIAN: Peranak ba Kampung Merakai deka nerima bekal ai pengudah projek nyambung paip tembu dipejalai.
Nitihka penerang Opis Menteri Utiliti kemari, bekal ai tu meri pemaik ngagai 445 iku peranak ba genturung pendiau nya.

“Sebedau projek nyambung batang paip tu dipejalai, peranak dia semina ngena ai bukit aja.

“Perintah Sarawak nengah Opis Menteri Utiliti Sarawak enggau Opis Bekal Ai Menua Pesisir (JBALB) Sarawak ti nyadi ejensi pengatur deka merambu enggau ngelangkar siti projek ngambi mutarka penanggul bekal ai beresi tu,” ku penerang nya.

Nitih ku penerang nya, projek nyambung paip ngagai Kampung Merakai tu udah nerima perati enggau dikemendar Perintah Sarawak lalu projek nya ulih dipejalai.

“Projek tu beungkus urung RM5 juta enggau udah tembu dipejalai kena 15 Disember 2019.

“Projek ti dipelanja Perintah Sarawak tu mungkur pengawa nyambung paip bansa 250 mm diameter ductile iron (DI) enggau 225 mm diameter HDPE ari Simpang Ladang Gedong ngagai Kampung Merakai enggau nyambung paip bukai,” terang iya.

Ba lansa bukai, Opis Menteri Utiliti mega madahka projek tu udah meri empas besai ngagai peranak ba Kampung Merakai nyengkaum 55 iku staf enggau nembiak ba Sekula Primari (SK) Merakai, Serian.

“Diatu, peranak di Kampung Merakai udah nerima bekal ai ke meruan agi asil inisiatif enggau pengeran Perintah Sarawak nengah Opis Menteri Utiliti enggau JBALB Bagi Menua Serian,” terang nya.

Suara Sarawak